តាមរយៈមន្ទីរវប្បធម៌ និង វិចិត្រសិល្បៈ ខេត្តកំពង់ធំ បានបញ្ជាក់ឱ្យបានដឹងថា នៅព្រឹកថ្ងៃទី ១៥ ខែសីហា ឆ្នាំ ២០២៥ នេះ លោក ហ៊ិន សោភ័ណ ប្រធានមន្ទីរព្រមទាំងការិយាល័យបេតិកភណ្ឌ សហការជាមួយការិយាល័យនគរបាលការពារបេតិកភណ្ឌ រដ្ឋបាលស្រុកសន្ទុក និង អធិការដ្ឋាននគរបាលស្រុកសន្ទុក បានចុះពិនិត្យ និង វាយតម្លៃវត្ថុសិល្បៈរកឃើញថ្មី ចំនួន ១ (មួយ) ដុំ/អង្គ នៅអធិការដ្ឋាននគរបាលស្រុកសន្ទុក។
តាមប្រភពបានឱ្យដឹងថា បដិមានេះ រកឃើញកាលពីរសៀលថ្ងៃទី ១៤ ខែសីហា ឆ្នាំ ២០២៥ ដោយអ្នកបើកបរគ្រឿងចក្រឈ្មោះ កាក់ ប៊ុនថន ត្រង់ចំណុចខាងលិចវត្តពង្រ ចម្ងាយប្រមាណ ២០០ ម៉ែត្រ ក្នុងពេលប្រតិបត្តិការនៃការស្តារស្ទឹង ស្ថិតនៅភូមិជីមាឃ ឃុំកកោះ ស្រុកសន្ទុក ខេត្តកំពង់ធំ។
ក្រោយពីការពិនិត្យចប់សព្វគ្រប់មក ជាលទ្ធផលបានបង្ហាញថា បដិមានេះធ្វើអំពីស្ពាន់ ទំនងជារូបតំណាងនៃទេពក្នុងព្រះពុទ្ធសាសនានិកាយមហាយានដែលគេស្គាល់ព្រះនាមថា «ព្រះពោធិសត្វអវលោតិកេស្វរ (លោកេសូរ)» ឬអាចជា «ព្រះពោធិសត្វមៃត្រេយ (សិអារ្យមេត្រិយ)» (ការសន្និដ្ឋាននេះមិនប្រាកដទាំងស្រុង ដោយសារការបាក់បែកនៅត្រង់ចំណុចថ្ងាស និង ផ្នួងសក់ ដែលជាលក្ខណៈសម្គាល់អំពីទេពទាំងពីរនេះ)។
ក្នុងនោះ បើតាមទម្រង់ព្រះភក្រ្ត និង សំពត់របស់ទេព បដិមានេះទំនងស្ថិតនៅក្នុងរចនាបថបាខែង (គ.ស.៨៩៣ – ៩២៥) ក្នុងរជ្ជកាលព្រះបាទស្រីយសោវរ្ម័នទី ១ ឬព្រះបាទស្រីហស៌វរ្ម័នទី ១។ បច្ចុប្បន្ននេះ បដិមា ត្រូវបានយកមករក្សាទុកនៅសារមន្ទីរខេត្តនៅព្រឹកថ្ងៃខែឆ្នាំដដែល៕
