នៅថ្ងៃទី ១៣ ខែកក្កដា ឆ្នាំ ២០២៥ នាយកដ្ឋានប្រឆាំងបទល្មើសបច្ចេកវិទ្យា បានជូនដំណឹងឱ្យបានដឹងថា កម្លាំងជំនាញនៃស្នងការដ្ឋាននគរបាលខេត្តត្បូងឃ្មុំ ខេត្តកំពង់ស្ពឺ និង ខេត្តកំពង់ចាម បានសហការជាមួយនាយកដ្ឋានប្រឆាំងបទល្មើសបច្ចេកវិទ្យា បានឃាត់ខ្លួនក្មេងទំនើងចំនួន ០៣ នាក់ ពាក់ព័ន្ធករណីបំផ្លិចបំផ្លាញទ្រព្យសម្បត្តិសាធារណៈ (បង្ហោះនៅលើបណ្តាញសង្គមTik Tok) ទៅកាន់ស្នងការដ្ឋាននគរបាលខេត្តត្បូងឃ្មុំ ដើម្បីធ្វើការសាកសួរតាមនីតិវិធី។
បន្ទាប់ពីការឃាត់ខ្លួន ក្មេងទំនើងទាំង ០៣ នាក់ បានឆ្លើយសារភាពថា ពួកគេពិតជាបានធ្វើសកម្មភាព យកអាវដៃវែងចំនួន ០២ ចងភ្ជាប់គ្នា ដោយយកចុងដៃអាវម្ខាងចងជាប់នឹងបង្គោលដែលដាំលើដងផ្លូវ ហើយយកចុងដៃអាវម្ខាងទៀតទៅចងជាប់នឹងចង្អើរម៉ូតូខាងក្រោយ ជិះម៉ូតូទៅមុខ ព្រមទាំងថតវីដេអូបង្ហោះនៅលើបណ្តាញសង្គម Tik Tok កាលពីថ្ងៃទី ០៦ ខែកក្កដា ឆ្នាំ ២០២៥ ចំណុចលើផ្លូវកៅស៊ូ ស្ថិតក្នុងភូមិខ្សាច់ប្រឆេះក្រោម ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ ពិតប្រាកដមែន។
យ៉ាងណាមិញ នៅថ្ងៃទី ១៣ ខែកក្ដដា ឆ្នាំ ២០២៥ វេលាម៉ោង ០៩:០០ នាទី សមត្ថកិច្ចជំនាញបានឱ្យក្មេងទំនើងទាំង ០៣ នាក់ ថតវីដេអូសុំទោសជាសាធារណៈបង្ហោះនៅលើបណ្ដាញសង្គមហ្វេសប៊ុក និង តិកតុក និង បានធ្វើកិច្ចសន្យាអប់រំណែនាំ ដោយមានការធានាពីអាណាព្យាបាល របស់យុវជនទាំង ០៣ នាក់ ខាងលើ ដើម្បីអប់រំនៅមូលដ្ឋានបន្ត៕
