កាលពីខែកុម្ភៈកន្លងទៅ CEO វ័យក្មេងរូបសង្ហា លោក អ៊ឹង ស៊ីវឈន់ បានធ្វើ Proposal សុំគូស្នេហ៍រៀបការយ៉ាងរ៉ូមែនទិក ដែលនារីគូដណ្តឹងជាបុត្រីក្នុងសែរាជវង្ស គឺ ព្រះអង្គម្ចាស់ក្សត្រិយ៍ នរោត្តម ពង្សសូរិយា។ មិនបង្អង់យូរ ចូលដល់ដើមខែឧសភាភ្លាម លោកបានរៀបចំពិធីចូលស្តីដណ្តឹងគូស្នេហ៍ទៅតាមប្រពៃណីយ៉ាងធំដុំ។
តាមរយៈរូបភាពថតដោយក្រុមថតរូប The Ring Wedding Cambodia ឃើញថាកម្មវិធីបានធ្វើឡើងកាលពីថ្ងៃទី ០១ ខែ ឧសភា ឆ្នាំ ២០២៥។ កម្មវិធីបានរៀបចំយ៉ាងប្រណីត ស្ថិតនៅគេហដ្ឋានដ៏ស្កឹមស្កៃមួយ។ លោក អ៊ឹង ស៊ីវឈន់ និង គូដណ្តឹង ព្រះអង្គម្ចាស់ក្សត្រិយ៍ នរោត្តម ពង្សសូរិយា បានស្លៀកពាក់ក្នុងឈុតពណ៌បៃតងយ៉ាងស្រស់ស្អាត ទឹកមុខញញឹមស្រស់ ពោរពេញដោយក្តីសុខ និង រីករាយជាពន់ពេក។ ជាពិសេស ឃើញថា ភ្ញៀវអញ្ជើញចូលរួម សុទ្ធតែជាសាច់ញាតិក្នុងសែរាជវង្ស ដែលក្នុងនោះមានវត្តមាន ព្រះនាងតូច នរោត្តម ជេនណា ផងដែរ។
គួរឱ្យដឹងដែរថា មុនឈានមកដល់ថ្ងៃជ័យនេះ លោក អ៊ឹង ស៊ីវឈន់ និង គូដណ្តឹងព្រះអង្គម្ចាស់ក្សត្រិយ៍ នរោត្តម ពង្សសូរិយា បានមើលចិត្តថ្លើមគ្នាប្រមាណ ៦ ឆ្នាំមកហើយ៕
