ក្រោយកម្មវិធី Miss Universe Cambodia 2025 បានប្រកួតរកឃើញរាជិនីគ្រងមកុដថ្មីបាន ១ សប្ដាហ៍ មកដល់ថ្ងៃទី ១៩ ខែកញ្ញា ឆ្នាំ ២០២៥ នេះ លើបណ្ដាញសង្គមអ្នកគាំទ្រវិស័យបវរកញ្ញាកំពុងចែករំលែកបង្ហាញការភ្ញាក់ផ្អើលខ្លាំង ក្រោយស្ថាប័ន MUC បានចេញសេចក្ដីប្រកាសជូនដំណឹងពីតំណែងជ័យលាភីលំដាប់រងទី ១ កញ្ញា សុគា គឹមលាង ពេលនេះមិនស្ថិតក្រោមការគ្រប់គ្រងរបស់ស្ថាប័នទៀតទេ។
ក្នុងសេចក្ដីជូនដំណឹងរបស់ស្ថាប័ន MUC បានឱ្យដឹងថា បវរកញ្ញា សុគា គឹមលាង MUC15 នឹងចាប់ផ្ដើមដំណើរថ្មីនៃជីវិត ដែលមិនស្ថិតក្រោមការគ្រប់គ្រងរបស់ស្ថាប័ន MUC បន្តទៀត ដោយមានការព្រមព្រៀងជាឯកច្ឆន្ទរវាងកញ្ញា សុគា គឹមលាង និង ស្ថាប័ន ដែលនាងបានបញ្ចប់កិច្ចសន្យាការងារដោយភាពរីករាយ និង ភាពតរភាព ក្រោមមូលហេតុពេលវេលាមិនអំណោយផល និង ភារកិច្ចមមាញឹកក្នុងការបម្រើនូវកិច្ចការងារផ្សេងៗជូនជាតិ និង ផ្ទាល់ខ្លួន។
ជាមួយគ្នានោះ ស្ថាប័នក៏បានបញ្ជាក់ឱ្យដឹងថា នេះមិនមែនជាការលាលែងតំណែងរបស់កញ្ញា សុគា គឹមលាង នោះទេ ប៉ុន្តែជាការឈានជំហានថ្មីមួយ និង ការបើកឱកាសក្នុងការលូតលាស់ និងការអភិវឌ្ឍន៍បន្តទៀត ព្រមទាំង កញ្ញា នឹងនៅតែមានឱកាសបន្តការងារជាមួយស្ថាប័ន MUC ជាបន្តនៅពេលខាងមុខទៀតផង៕
