នាពេលថ្មីៗនេះ Time and Date បានចុះផ្សាយឱ្យបានដឹងថា ចុងសប្ដាហ៍នេះ នឹងមានបាតុភូតចន្ទគ្រាសពេញលេញមួយ ដែលជាពេលព្រះចន្ទត្រូវស្រមោលផែនដីបាំងជិតទាំងស្រុង នឹងកើតមានឡើង ហើយបណ្តាប្រទេសជាច្រើន នឹងអាចមើលឃើញវាតាំងពីដើមរហូតដល់ចប់ ដែលក្នុងនោះរួមមានទាំងប្រទេសកម្ពុជាផងដែរ។
តាមប្រភពព័ត៌មានបានឱ្យដឹងថា បាតុភូតចន្ទគ្រាសពេញវង់ខាងលើ នឹងអាចត្រូវមើលឃើញពីបណ្តាប្រទេសនៅអាស៊ី អាហ្រ្វិក អឺរ៉ុបខាងកើត និង ភាគខាងលិចប៉ាស៊ីហ្វិក ប្រសិនបើផ្ទៃមេឃស្រឡះល្អ។ ក្នុងនោះ សម្រាប់នៅកម្ពុជាផ្ទាល់ ក៏នឹងអាចមើលឃើញបាតុភូតនេះ ចាប់ផ្តើមពីវេលាម៉ោង ១១៖៣០ យប់ ថ្ងៃទី ៧ ខែកញ្ញា រហូតដល់ម៉ោងខ្ទង់ ៣ រំលងអធ្រាត្រ ឈានចូលថ្ងៃទី ៨ ខែកញ្ញា។
គួរឱ្យដឹងដែរថា អំឡុងបាតុភូតចន្ទគ្រាសនេះ ព្រះចន្ទនឹងមានពណ៌ក្រហម ប្រៀបដូចជាលោហិតយ៉ាងដូច្នោះ។ វាមើលទៅមានពណ៌បែបនេះ ដោយសារតែការជះរាយប៉ាយ នៃ កាំពន្លឺ ព្រះអាទិត្យ នៅ ក្នុង បរិយា កាសផែនដី៕
