តាមរយៈព្រះរាជក្រឹត្យ ចុះថ្ងៃទី ២៨ ខែមីនា ឆ្នាំ ២០២៥ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ទ្រង់ត្រាស់បង្គាប់ តែងតាំងមុខតំណែងជា អនុរដ្ឋលេខាធិការ នៃក្រសួងធម្មការ និង សាសនាចំនួន ២ រូប គឺ ឯកឧត្តម ជួន កក្កដា និង ឯកឧត្តម សួន សុធារ៉ា។
នៅក្នុងមាត្រា ២ នៃព្រះរាជក្រឹត្យនេះ ព្រះមហាក្សត្របានត្រាស់បង្គាប់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្ថលេខាតទៅ។
សូមរំឭកផងដែរថា ឯកឧត្តម ជួន កក្កដា ព្រះវិន័យធរគណខេត្តតាកែវ និង ជាព្រឹទ្ធបុរសរងនៃពុទ្ធិកសកលវិទ្យាល័យព្រះសីហនុរាជ នាយកសាលាពុទ្ធិកនាងខ្មៅ បានលាចាកសិក្ខាបទ នៅថ្ងៃទី ១៩ ខែមីនា ឆ្នាំ ២០២៥ ក្រោយបានបួសក្នុងវិស័យព្រះពុទ្ធសាសនា ជាង ២៧ ព្រះវស្សា៕
