បើគិតមកដល់ពេលនេះ រយៈពេលប្រមាណជិតកន្លះឆ្នាំមកហើយ ដែលកីឡាករបាល់ទាត់ លោក ទេស សម្បត្តិ បានលាចាកលោក ក្នុងហេតុការណ៍គ្រោះថ្នាក់ចរាចរណ៍ នៅក្នុងប្រឡាយទឹកសាក់សំពៅ ស្ថិតនៅភូមិកំរៃ សង្កាត់សាក់សំពៅ ខណ្ឌដង្កោ រាជធានីភ្នំពេញ កាលពីថ្ងៃទី ២១ ខែមេសា ឆ្នាំ ២០២៥ កន្លងទៅ។
ការបាត់បង់ធនធានមនុស្សដូចជាលោក ទេស សម្បត្តិ នេះដែរ បានធ្វើឱ្យមហាជន អ្នកគាំទ្រ មិត្តភក្តិ ជាពិសេស ក្រុមគ្រួសារ ប្រពន្ធ ដែលមានកូនតូចរបស់លោក នៅអាឡោះអាល័យមិនទាន់កាត់ចិត្តបាននៅឡើយនោះទេ។
ជាក់ស្តែង នៅថ្ងៃទី ២០ ខែតុលា ឆ្នាំ ២០២៥ នេះ មហាជនបានបង្ហាញអារម្មណ៍ក្តុកក្តួលយ៉ាងខ្លាំង ក្រោយឃើញវីដេអូរបស់ភរិយាលោក ទេស សម្បត្តិ បានរៀបចំពិធីខួបកំណើតជូនស្វាមីនៅមុខរូបថត និង ធាតុ ដោយអមនូវសារថា៖ «អ្នកណាទៅដាច់ចិត្តឱ្យឆ្លងឆ្នាំម្នាក់ឯងនោះ! នៅកំដរដូចដើមណា សម្បត្តិ។ នៅក្នុងចិត្តជានិច្ច លេខ ១ ដដែល (ពាក្យដែលតែងនិយាយ)»៕
