ពិតទេ? ការសិក្សាថ្មីបង្ហាញថា យុវវ័យពូកែលើកដាច់ មានឱកាសរកលុយបានច្រើន ជីវិតឆាប់ជោគជ័យ

តាមការសិក្សាថ្មីថ្មោង បានរកឃើញថា អ្នកដែលពូកែផឹក(គ្រឿងស្រវឹង) មិនងាយនឹងជួបភាពបរាជ័យឡើយ ជាពិសេស យុវវ័យ។ លើសពីនេះ អ្នកពូកែផឹកថែមទាំងអាចបង្កើតឱកាសជោគជ័យក្នុងជីវិតនៅពេលបន្ទាប់ផងដែរ។​

តួយ៉ាង តាមរយៈ លោក Willy Pedersen ដែលជាអ្នកសង្គមវិទូជនជាតិន័រវេសមកពីសាកលវិទ្យាល័យ Oslo បានសរសេរនៅក្នុងសៀវភៅចេញថ្មីរបស់លោក ចំណងជើង ““The Beauty and Pain of Drugs” ដោយអះអាងថា ការផឹកស្រាជួបជុំគ្នានៅវ័យក្មេងអាចជួយរារាំងការអែអង់ ការទាក់ទើរ ឬ ការមិនហ៊ាន ដោយធ្វើឱ្យមានសេចក្តីក្លាហាននៅក្នុងការទំនាក់ទំនងសង្គម។ វាមានន័យថា ការផឹកស្រាអាចជួយឱ្យមនុស្សហ៊ាននិយាយ ហ៊ានទំនាក់ទំនង ជជែកដោយភាពរលូន ហើយក៏ធ្វើឱ្យការចរចាឆាប់ជោគជ័យលឿន ជាងអ្នកដែលមិនផឹកស្រា ឬ ស្ងៀមស្ងាត់។

ដើម្បីធ្វើការពិសោធថាតើស្រាអាចជួយឱ្យឆាប់ជោគជ័យឬអត់ សាស្ត្រាចារ្យខាងលើ និង ក្រុមការងាររបស់លោក បានចំណាយពេលរហូតដល់ទៅ ១៨ ឆ្នាំ តាមដានទម្លាប់នៃការផឹកស្រារបស់ជនជាតិន័រវេសប្រមាណ ៣០០០ នាក់ ចាប់ពី អាយុ ១៣ ឆ្នាំ ដល់ ៣១ ឆ្នាំ។

ជាលទ្ធផលគេរកឃើញថា អ្នកដែលចាប់ផ្តើមចេះផឹកលឿននៅក្នុងវ័យជំទង់ និង ក្នុងអាយុខ្ទង់ ២០ ឆ្នាំ មានកម្រិតអប់រំខ្ពស់ និង ទទួលបានប្រាក់ចំណូលច្រើនជាងអ្នកមិនផឹកស្រា ឬ ផឹកតិចតួច។ ហេតុដូច្នេះ សាស្ត្រាចារ្យ និង ក្រុមការងារខាងលើ ហ៊ានធានាថា លទ្ធផលនេះពិតជាច្បាស់លាស់ និង ប្រាកដខ្លាំង៕

ប្រភព៖ NYP