ជោគជ័យថ្មី! តី វាយម៉ាលុយ ក្លាយជាតារាចម្រៀងរ៉េបផ្លូវការ ជ្រកក្រោមផលិតកម្មល្បីមួយ

ជាការពិតណាស់ មហាជននិយមតាមដានស្តាប់បទចម្រៀងរ៉េបច្បាស់ជាបានស្គាល់ហើយពីផលិតកម្ម KlapYaHandz – ក្លាបយ៉ាហ៊ែន ដែលជាផលិតកម្មចាស់វស្សាមួយនៅក្នុងវិស័យចម្រៀងរ៉េបនាប្រទេសកម្ពុជា។ ក្នុងនោះ ផលិតកម្មនេះ ក៏មានតារាចម្រៀងរ៉េបប្រុសស្រីជាច្រើនបានជ្រកក្រោមទ្រនំ ដោយនៅឆ្នាំចុងក្រោយនេះ ពោលគឺឆ្នាំ ២០២៥ ផលិតកម្ម KlapYaHandz – ក្លាបយ៉ាហ៊ែន មានតារាចម្រៀងរ៉េបសុទ្ធតែជាបុរសប៉ុណ្ណោះ។

ដោយឡែក អ្វីដែលកំពុងតែធ្វើឱ្យអ្នកគាំទ្រផលិតកម្មខាងលើ មានការភ្ញាក់ផ្អើលនោះ ថ្មីៗនេះ ផលិតកម្ម KlapYaHandz – ក្លាបយ៉ាហ៊ែន បានប្រកាសពីសមាជិកថ្មី ពោលគឺតារាចម្រៀងរ៉េបផ្នែកនារីមួយរូបទៀត ដែលបានចូលរួមមកជ្រកក្រោមផលិតកម្ម ហើយតារាចម្រៀងរ៉េបនារីនោះ មិនមែនជាអ្នកណាឆ្ងាយនោះឡើយ ពោលគឺតារាចម្រៀងរ៉េប កញ្ញា តី។

ក្នុងនោះ ក្រោយទទួលបានដំណឹងនៃការបោះជំហានចូលផលិតកម្ម KlapYaHandz – ក្លាបយ៉ាហ៊ែន ហើយនោះ កញ្ញា តី ត្រូវបានអ្នកគាំទ្រ និង មិត្តទាំងក្នុងក្រៅសិល្បៈជាច្រើន បានចូលរួមអបអរសាទរនូវដំណើរថ្មីលើវិថីសិល្បៈចម្រៀងរ៉េបរបស់នាង។ លើសពីនោះ មហាជនក៏បានសរសើរពីការប្រឹងប្រែងរបស់កញ្ញា តី ដែលពុះពារតាំងពីអាជីពជាអ្នករាំ រហូតក្លាយជាតារាចម្រៀងរ៉េប និង វិវត្តន៍ខ្លួនមកកាន់ផលិតកម្មល្បីក្នុងឧស្សាហកម្មតន្ត្រីរ៉េប KlapYaHandz – ក្លាបយ៉ាហ៊ែន នាពេលនេះទៀតផង៕