ថ្មីៗនេះមានការរាយការណ៍ពីករណីការស្លាប់របស់ក្មេងស្រីវ័យ ១៤ ឆ្នាំម្នាក់នៅឯប្រទេសម៉ិកស៊ិក ក្រោយពីបាននាំទៅកែដើមទ្រូងជាមួយនឹងគ្រូពេទ្យដែលជាប្តីថ្មីរបស់ខ្លួន។
តាមព័ត៌មានបានឱ្យដឹងថា ក្មេងស្រីខាងលើនេះ ត្រូវបានម្តាយនាំទៅកែពង្រីកទំហំដើមទ្រូង និងត្រគាក ក្រោមស្នាដៃរបស់គ្រូពេទ្យម្នាក់វ័យ ៤៥ ឆ្នាំ ដែលជាម្ចាស់គ្លីនិកកែសម្ផស្ស និងជាសង្សារថ្មីរបស់ស្រ្តីជាម្តាយផ្ទាល់។ ជាអកុសលការវះកាត់មិនបានបញ្ចប់ទៅដោយជោគជ័យឡើយ ដោយក្មេងស្រីនេះកើតអាការហើមខួរក្បាល និងបញ្ហាបេះដូង រហូតដល់ចុងក្រោយនាងក៏បានបាត់បង់ជីវិត។
យ៉ាងណាមិញ ស្រ្តីជាម្តាយមិនបានសុំការអនុញ្ញាត ឬពិភាក្សាជាមួយនឹងអតីតស្វាមី ឬជាឪពុកបង្កើតរបស់ក្មេងស្រីខាងលើនេះឡើយ ហើយថែមកុហកថាកូនស្រីស្លាប់ដោយសារកើតជំងឺកូវីដទៀត។ ដោយឡែក បុរសជាឪពុកបានឃើញសាកសពកូនស្រីខុសប្លែកពីធម្មតា ដោយដើមទ្រូងនាងមើលទៅធំជាងមុន ទើបឆោឡោនាំសពទៅធ្វើកោសល្យវិច្ច័យម្តងទៀត។ ចុងក្រោយគ្រូពេទ្យវះកាត់នោះ ត្រូវបានគេព្យួរអាជ្ញាប័ណ្ណ និងនាំខ្លួនទៅស៊ើបសួរជាមួយនឹងស្រ្តីជាម្តាយ ក្រោមការចោទប្រកាន់ពីបទការធ្វេសប្រហែសផ្នែកវេជ្ជសាស្រ្ត និងការសម្លាប់មនុស្សដោយការធ្វេសប្រហែស៕
