អ្នកគាំទ្រវិស័យភាពយន្តសុទ្ធសឹងតែបានស្គាល់ពីស្រីស្អាត នូណា ដែលជាតារាសម្ដែងស្រីវ័យក្មេងដ៏មានប្រជាប្រិយភាពមួយរូប ទទួលបានការចាប់អារម្មណ៍គាំទ្រខ្លាំងតាមរយៈស្នាដៃសម្ដែងភាពយន្តដ៏មានទេពកោលស្យរបស់នាងជាច្រើនកន្លងមក ជាពិសេសនាងតែងឆក់បានការសរសើរពីរូបសម្រស់ដ៏ស្រស់ស្អាត និង អត្តចរិតគួរឱ្យស្រឡាញ់របស់នាង។
ក្រៅពីជីវិតសិល្បៈ តារាសម្ដែងស្រីវ័យក្មេងរូបនេះ ក៏ទទួលបានការចាប់អារម្មណ៍លើជីវិតឯកជនរបស់នាងដែរ ប៉ុន្តែបើទាក់ទងនឹងរឿងរ៉ាវស្នេហាវិញ កន្លងមក នូណា ពុំដែលធ្លាប់បង្ហាញពីចំណងស្នេហ៍ជាមួយបុរសរូបណាជាសាធារណៈឡើយ ដោយភាគច្រើន គេឃើញនាងចាយជីវិតបែបយុវវ័យនៅលីវយ៉ាងរីករាយ។
ដោយឡែក ថ្មីៗកន្លងទៅនេះ អ្វីដែលធ្វើឱ្យមហាជនអ្នកគាំទ្រចាប់អារម្មណ៍ភ្ញាក់ផ្អើលខ្លាំង ទាក់ទងនឹងជីវិតឯកជនរបស់តារាសម្ដែងស្រីវ័យក្មេង នូណា ខណៈស្ងាត់ៗបានឃើញនាងកាន់ដៃបុរសរូបសង្ហាម្នាក់ដែលអាចជាគូស្នេហ៍ Private បានរៀបចំកម្មពិធីភ្ជាប់ពាក្យយ៉ាងធំដុំនៅថ្ងៃទី ៧ ខែមិថុនា ឆ្នាំ ២០២៥។ លើសពីនេះ កូនកំលោះរបស់ នូណា គឺជាសុភាពបុរស មានចំណេះដឹងខ្ពស់ ថែមទាំងមានជីវិតហាយសូរមិនធម្មតាឡើយ។
ចំពោះដំណឹងដ៏សិរីមង្គលនេះដែរ មហាជនអ្នកគាំទ្រ ក៏ដូចជាមិត្តអ្នកសិល្បៈជាច្រើនបានចែករំលែករាល់សកម្មភាពនៃកម្មពិធីភ្ជាប់ពាក្យរបស់ នូណា និង បង្ហាញការអបអរជូនពរដល់ថ្ងៃពិសេសរបស់នាង និង គូដណ្ដឹងរូបសង្ហាផងដែរ៕
