នៅព្រឹកព្រលឹមថ្ងៃទី ១៥ ខែកញ្ញា ឆ្នាំ ២០២៥ នេះ សារព័ត៌មាន Khaosod បានរាយការណ៍ពីករណីអគ្គិភ័យនៅក្នុងរោងចក្រមួយនៅក្នុងទីក្រុងបាងកក បង្កជាការភ្ញាក់ផ្អើលជាខ្លាំង។
តាមព័ត៌មានបានឱ្យដឹងថា រោងចក្រ និងក្រុមហ៊ុនមួយកន្លែងនេះ ស្ថិតនៅក្នុងសង្កាត់សយសែមដាំ ខណ្ឌបាងឃុនធាន ទីក្រុងបាងកក ដោយអគ្គិភ័យបានចាប់ផ្តើមឆាបឆេះពីក្នុងបន្ទប់ផ្ទុកសារធាតុគីមីម៉ាញ៉េស្យូម និងអាស៊ីតស៊ុលហ្វួរិក។ ក្នុងនោះ អាជ្ញាធរមិនអាចប្រើទឹកពន្លត់ភ្លើងក្នុងបន្ទប់ឆាបឆេះបាន ទើបបានព្យាយាមបាញ់ស្រោចនៅជុំវិញបរិវេណនោះវិញ ដើម្បីការពារកុំឱ្យភ្លើងរាលដាល។
យ៉ាងណាមិញ អាជ្ញាធរបានព្យាយាមធ្វើការពន្លត់អស់រយៈពេល ៣០ នាទី ទើបអាចគ្រប់គ្រងស្ថានការណ៍បាន ហើយក៏បានទាក់ទងទៅអាជ្ញាធរពាក់ព័ន្ធផ្សេងៗឱ្យចុះមកត្រួតពិនិត្យរោងចក្រមួយនេះ និងស្រាវជ្រាវរកមូលហេតុនៃការឆាបឆេះ៕
ប្រភព៖ Khaosod
