កាលពីថ្ងៃទី ៩ ខែតុលា ឆ្នាំ ២០២៥ កន្លងទៅនេះ Influencer ល្បីរបស់ថៃគឺ Gun Jompalang បានផុសប្រកាសទិញទូកុងតឺន័រតាមការស្នើសុំឱ្យជួយរបស់ទាហាន ហើយនឹងធ្វើការបញ្ជូនទៅកាន់ភូមិជោគជ័យ ដើម្បីយកទៅតម្រៀបធ្វើរបងការពារពីប្រជាជនខ្មែរដែលកំពុងតែធ្វើការតវ៉ា។
តាមព័ត៌មានបានឱ្យដឹងថា Gun Jompalang បានប្រកាសទិញទូកុងតឺន័រដែលមានប្រវែង ៦ ម៉ែត្រចំនួន ៦០ ទូ តាមការស្នើសុំរបស់កងកម្លាំងទាហានដែលកំពុងតែទប់ស្កាត់ការតវ៉ាពីប្រជាជនខ្មែរនៅភូមិជោគជ័យ ស្រុកអូរបីជាន់ ខេត្តបន្ទាយមានជ័យ។ ក្រោយពីបានប្រកាសរកមិនបានប៉ុន្មាន Gun Jompalang បានប្រមូលបានគ្រប់ទូតាមដែលត្រូវការហើយ ដោយនឹងបញ្ជូនទៅកាន់ភូមិបានណងចាន់ចំនួន ៦០ ទូ នៅថ្ងៃទី ១០ ខែតុលា ឆ្នាំ ២០២៥ នេះ និងចំនួន ២០ ទូទៀត នឹងបញ្ចូនទៅថ្ងៃទី ១១ ខែតុលា ឆ្នាំ ២០២៥។
យ៉ាងណាមិញ មុននឹងយកទូទាំងនេះទៅប្រគល់ឱ្យកងកម្លាំងទាហាន Gun Jompalang ថែមទាំងបានបើកឱ្យអ្នកគាំទ្ររបស់ខ្លួននាំគ្នាមកសរសេរសារលើកទឹកចិត្តឱ្យទាហាននៅលើទូកុងតឺន័រទាំងអស់ទៀតផង៕
ប្រភព៖ Khaosod
