បើទោះជាកម្មវិធី MasterChef Cambodia រដូវកាលទី ៣ បានរំលងផុតទៅអស់ជាច្រើនខែក្តី តែគូស្នេហ៍ ដែលបានចាប់ផ្តើមស្គាល់ចិត្តថ្លើម ស្រឡាញ់គ្នាក្នុងកម្មវិធីរហូតត្រូវគេបានដាក់ងារកម្មវិធីថា «MasterChef ជួបស្នេហ៍» គឺ កញ្ញា ឆៃ តារាម៉ាលីន និង លោក ចៅ ដាឡែត នៅតែទទួលបានការគាំទ្រ និង បន្តតាមដានពីជីវិតឯកជនរបស់អ្នកទាំង ២ ជានិច្ច។
ជាការពិត គេចាំបានថា អំឡុងពេលប្រកួតបើទោះជាមានដំរួយពីទំនាក់ទំនង ថាលួចបង្កាត់ភ្លើងស្នេហ៍នឹងគ្នាក្តី តែកញ្ញា ឆៃ តារាម៉ាលីន និង លោក ចៅ ដាឡែត មិនទាន់បើកចំហទាំងស្រុងនោះឡើយ រហូតកម្មវិធីកាន់តែកៀកបញ្ចប់ទើប គូស្នេហ៍មួយគូនេះ កាន់តែបង្ហាញពីភាពស្និទ្ធស្នាលបញ្ជាក់ថា អ្នកទាំងពីរពិតជាស្រឡាញ់គ្នាមែន។
ដោយឡែក ក្រោយបើកចំហទំនាក់ទំនងកាន់តែច្បាស់ អ្នកគាំទ្រក៏សង្កេតឃើញថា កញ្ញា ឆៃ តារាម៉ាលីន និង លោក ចៅ ដាឡែត រមែងទៅណាមកណាជាមួយគ្នាជានិច្ច បើទោះជាខាងស្រីរស់នៅខេត្តកំពត រីឯខាងប្រុសរស់នៅឯខេត្តពោធិ៍សាត់ក្តី។ ជារឿយៗ គេតែងឃើញលោក ដាឡែត ទៅលេង និង ជួយការងាររកស៊ីកញ្ញា ម៉ាលីន ដល់ខេត្តកំពត រីឯកញ្ញា ម៉ាលីន ក៏ទៅលេងស្រុកកំណើតជួបអ្នកម្តាយ ដាឡែត ដូចគ្នា។
ម្យ៉ាងវិញទៀត ថ្មីៗនេះ មហាជនកាន់តែឃើញភាពផ្អែមល្ហែមក្បែរគ្នាមិនដាច់របស់បេក្ខជនឆ្នើម MasterChef Cambodia រដូវកាលទី ៣ ទាំង ២ រូប ខាងលើ ដោយការដើរកម្សាន្តតាមបណ្តាខេត្តជាមួយគ្នាញឹកញាប់ និង ធ្វើឱ្យអ្នកគាំទ្រជាច្រើន នាំគ្នាលើកឡើងថា មិនយូរទេ អាចនឹងមានដំណឹងល្អពីរឿងមង្គលការក៏ថាបាន៕
