ថ្មីៗនេះ អ្នកលេងបណ្តាញសង្គមហ្វេសប៊ុក បានបង្ហាញក្តីក្តុកក្តួលយ៉ាងខ្លាំង ខណៈបានឃើញ លោក សាយ បានបង្ហោះពីដំណឹងមរណភាពរបស់ដូនចាស់ម្នាក់ វ័យ ១០៥ ឆ្នាំ ដែលកំពុងស្នាក់នៅជំរំភៀសសឹក វត្តពោធិ៍ ៥០០០ ដើម។
ក្នុងនោះ តាមការរៀបរាប់របស់លោក សាយ បានឱ្យដឹងថា៖ «លោកយាយ ថោង សាម៉ន ព្រះជន្ម ១០៥ ឆ្នាំ បានទទួលមរណភាព កាលពីម៉ោង ១១:៣០ នាទីយប់ នៅជំរំភៀសសឹក វត្តពោធិ៍ ៥០០០ ដើម កាលពីថ្ងៃទី ២១ សីហា ២០២៥ នេះ។ លោកយាយបានឆ្លងកាត់សង្រ្គាមជាច្រើនលើកច្រើនសា មិនថាសង្រ្គាមលោកលើកទី ២ សង្រ្គាមទាមទារឯករាជ្យពីបារាំង សង្រ្គាមឥណ្ឌូចិន មានទាំងរបបប្រល័យពូជសាសន៍ខ្មែរក្រហម សង្រ្គាមសុីវិល និង ចុងក្រោយគេបង្អស់ កម្ពុជា-ថៃ ២០០៨-២០១១ ហើយពេលនេះម្តងទៀត ដែលលោកយាយត្រូវជាជនភៀសសឹកមករស់នៅជំរំភៀសសឹក ដែលចុងក្រោយក៏ត្រូវអស់សង្ខារត្រឹមកន្លែងនេះ។
ក្នុងវដ្តជីវិតជនជាតិខ្មែរមួយ ត្រូវឆ្លងកាត់សង្រ្គាមច្រើនដងដល់ថ្នាក់នេះ មិនអាចទេ ដែលប្រទេសនេះចង់មានសង្រ្គាម ឬ បង្កសង្រ្គាមនោះ យើងចង់បានសន្តិភាព និងសុខុមាលភាពជូនប្រជាពលរដ្ឋតែប៉ុណ្ណោះ។ កម្ពុជាហត់ហើយជាមួយសង្រ្គាម កម្ពុជាឆ្អែតហើយជាមួយការភៀសសឹក កម្ពុជាគ្រាន់តែការពារអធិបតេយ្យភាពខ្លួន នូវអ្វី ដែលមានសព្វថ្ងៃប៉ុណ្ណោះ។ កម្ពុជាត្រូវការសន្តិភាព និងមិនដែលឈ្លានពានអ្នកណាឡើយ»។
អ្វីដែលកាន់តែក្តុកក្តួលទៀតនោះ តាមរយៈក្រុមការងាររបស់លោក សាយ បានឱ្យដឹងថា មុនទទួលមរណភាព លោកយាយ ចង់ទទួលបានរទេះរុញមួយ ព្រោះលោកយាយដើរមិនរួច តែជាអកុសល លោកយាយ ទើបទទួលបានរទេះរុញ ២ សប្តាហ៍ ក៏ទទួលមរណភាពទៅ៕
