ក្រោយពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ បានបញ្ចប់ទៅជាស្ថាពរ ក្រសួងទេសចរណ៍ បានបើកបង្ហាញតួរលេខខេត្ត-ក្រុង ដែលទទួលបានភ្ញៀវទេសចរច្រើនជាងគេទាំង ៥ ក្នុងពិធីបុណ្យចូលឆ្នាំថ្មីទាំង ៣ ថ្ងៃ រួមមានរាជធានីភ្នំពេញ ខេត្តសៀមរាប ខេត្តកំពង់ចាម ខេត្តព្រៃវែង ខេត្តបាត់ដំបង។
អ្វីដែលគួរឱ្យកត់សម្គាល់នោះគឺ ខេត្តកំពង់ចាម នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ទាំង ៣ ថ្ងៃ គឺទទួលបានចំណាត់ថ្នាក់លេខ ៣ ជាខេត្តដែលមានភ្ញៀវទេសចរលេងកម្សាន្តច្រើនជាងគេ នេះគឺអាចដោយសារតែមន្តស្នេហ៍នៃព្រឹត្តិការណ៍ថ្មីដែលទើបតែបង្កើតឡើង និង ពុំធ្លាប់មានពីមុនមក គឺព្រឹត្តិការណ៍លៀសហាលចំនួន ៣ តោន លាតគ្នាប្រវែង ១០០០ ម៉ែត្រ ដែលរៀបចំឡើងនៅថ្ងៃចូលឆ្នាំទី ២ ចាប់ពីចំណុចមុខសាលាខេត្ត ដែលទទួលបានការគាំទ្រយ៉ាងច្រើនក្រៃលែង។
សូមបញ្ជាក់ផងដែរថា ក្នុងរយៈពេល ៣ ថ្ងៃនៃបុណ្យចូលឆ្នាំខ្មែរ ខេត្តកំពង់ចាម មានភ្ញៀវទេសចរណ៍មកលេងកម្សាន្តសរុបចំនួន ២ ៧៤៨ ២២៨ នាក់។ ដ្បិតពិធីបុណ្យចូលឆ្នាំថ្មីប្រពៃណីជាតិខ្មែរបញ្ចប់ទៅក្ដី តែរដ្ឋបាលខេត្តកំពង់ចាម បានជូនដំណឹងពីការអនុញ្ញាតបន្តលេងទឹកចំនួន ២ ថ្ងៃទៀត នៅតំបន់ត្រជាក់ ហើយថ្ងៃទី ១៨ នេះ គឺជាថ្ងៃបង្ហើយផងដែរ៕
