នៅថ្ងៃទី ១៩ ខែវិច្ឆិកា ឆ្នាំ ២០២៥ នេះ សារព័ត៌មាន Khaosod បានរាយការណ៍ថា មានការប្រទះឃើញស្នាមសត្វល្មូនខ្នាតយក្ស វារកាត់ពេញវាលស្រែ បង្កឱ្យប្រជាជនផ្អើលថាជាសត្វនាគរាជឡើងមកការពារទៅវិញ។
តាមព័ត៌មានបានឱ្យដឹងថា ស្នាមសត្វល្មូននេះ ត្រូវបានគេប្រទះឃើញនៅតំបន់វាលស្រែមួយកន្លែង ស្ថិតនៅក្នុងឃុំហួយកែវ ស្រុកភូកាំយ៉ាវ ខេត្តផាយ៉ាវ។ ស្នាមនេះមានប្រវែងទទឹងប្រហែល ១ ម៉ែត្រ និងលាតសន្ធឹងជាបណ្តោយប្រមាណជាង ៥០០ ម៉ែត្រ ដែលមើលទៅដូចជាមានសត្វដ៏ធំម្យ៉ាងវារកាត់លើស្រូវបណ្តាលឱ្យបាក់រាបដល់ដីបង្កទៅជាស្នាមយ៉ាងគួរឱ្យខ្លាច។
យ៉ាងណាមិញ អ្នកស្រុកជាច្រើនបាននាំគ្នានិយាយថា ស្នាមនេះអាចជាស្នាមរបស់ស្តេចនាគរាជ ដែលធ្វើឡើងមកដំណើរទៅកាន់វត្តប៉ាពុទ្ធាជិនវង្សសារាម ដែលជាវត្តអ្នកស្រុកគោរពបូជាថាជាលំនៅរបស់ស្តេចនាគរាជមុច្ចលិន ជាស្តេចនាគរាជដែលតែងតែថែរក្សាដែនដី និងអ្នកស្រុករស់នៅម្តុំនេះ។ អ្នកស្រុកជឿថា ស្តេចនាគរាជបានឡើងមកថែរក្សាផែនដីនៅថ្ងៃសំខាន់របស់ប្រទេសថៃ ហើយអ្នកស្រុកក៏កាន់តែមានជំនឿមួយកម្រិតទៀតផងដែរ៕
ប្រភព៖ Khaosod
