កាលពីថ្ងៃទី ១៩ ខែវិច្ឆិកា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេស សិល្បករ សិល្បការិនីជាច្រើន បានបង្ហាញក្តីរន្ធត់ចិត្តបន្ទាប់ពីទទួលបានដំណឹងមរណភាពរបស់លោក អ៊ុន សិទ្ធា ដែលជាតារាបង្ហាញម៉ូដ ពិធីករ និង តារាសម្តែងដ៏មានប្រជាប្រិយភាពមួយរូប។
ដំណឹងខាងលើនេះ បានធ្វើឱ្យមហាជន និង មិត្តទាំងក្នុង ក្រៅសិល្បៈជាច្រើន បានបង្ហាញក្តីរន្ធត់ និង ទទួលយកមិនទាន់បាន ខណៈលោក អ៊ុន សិទ្ធា ចាកចេញភ្លាមៗពេក ដោយមិនដែលបង្ហើបដំណឹងពីសុខភាពរបស់ខ្លួនជាសាធារណៈម្តងណាឡើយ។
ជុំវិញជំងឺរបស់លោក អ៊ុន សិទ្ធា បើតាមការឱ្យដឹងពី លោកជំទាវ ចន ច័ន្ទលក្ខិណា បានបង្ហោះនៅលើហ្វេសប៊ុកថា លោក អ៊ុន សិទ្ធា ទទួលមរណភាព ដោយជំងឺដំបៅក្រពះ ពោះវៀនធ្ងន់ធ្ងរ និង ទឹកដក់ក្នុងពោះ។
គួរជម្រាបថា ពេលនេះពិធីបុណ្យសពលោក អ៊ុន សិទ្ធា បាន និង កំពុងរៀបចំតាមប្រពៃណីនៅគេហដ្ឋានរបស់លោកនៅផ្ទះលេខ 1B, ផ្លូវលេខ 17, ភូមិប៉ប៉្រកខាងត្បូង, សង្កាត់កាកាបទីមួយ, ខណ្ឌ ពោធិ៍សែនជ័យ, រាជធានីភ្នំពេញ៕
