សឹងតែគ្រប់គ្នា នៅពេលមិនសមបំណងនូវអ្វីដែលខ្លួនចង់បាន មិនថានៅក្នុងគ្រួសារ ការងារ មិត្តភាព ទំនាក់ទំនងស្នេហា ឬក្តីស្រមៃ រមែងគិតថាខ្លួនឯងគ្មានតម្លៃគ្រប់គ្រាន់។ តែយ៉ាងណាមិញ តម្លៃខ្លួនឯងវាមិនស្ថិតនៅលើអ្វីទាំងនេះនោះទេ បើតាម អ្នកឧកញ៉ា គិត ម៉េង លោកបានរៀបរាប់យ៉ាងសមហេតុផល ដោយថាតម្លៃរបស់យើង គឺស្ថិតនៅលើយើងខ្លួនឯងតែម្តង។
ជាក់ស្តែង អ្នកឧកញ៉ា គិត ម៉េង បានបង្ហោះសាររៀបរាប់ក្បោះក្បាយដូច្នេះថា៖ «សូមឈប់សួរខ្លួនឯងថា៖ «តើខ្ញុំមានតម្លៃខ្លួនគ្រប់គ្រាន់ឬនៅ?» តើអ្នកធ្លាប់សួរខ្លួនឯងនូវសំណួរនេះពីមុនមកទេ? អ្នកប្រហែលជាមានអារម្មណ៍ថាខ្លួនអ្នកមិនទាន់មានតម្លៃ ឬសមត្ថភាពគ្រប់គ្រាន់ នៅពេលដែលអ្នកមិនទទួលបានការងារ ឬពេលដែលមិត្តរបស់អ្នកលែងឆ្លើយតបអ្នក ឬពេលដែលអ្នកឃើញអ្នកផ្សេងរស់នៅក្នុងជីវិតដែលអ្នកសុបិនចង់បាន។ «តើខ្ញុំមានតម្លៃខ្លួនគ្រប់គ្រាន់ឬនៅ?» ក៏ជាសំណួរដែលអ្នកសួរខ្លួនអ្នកច្រើនដងផងដែរដោយគ្មានទីបញ្ចប់ បន្ទាប់ពីមនុស្សណាម្នាក់ដែលអ្នកបេតី បានចាកចេញពីអ្នក។
ទោះយ៉ាងណា ខ្ញុំសូមបង្ហាញអ្នកនូវចំណុចសំខាន់មួយថា «ការឱ្យតម្លៃខ្លួនឯង» មិនមែនជាអ្វីដែលបានមកពីសមិទ្ធផល ឬពីគោលដៅដែលអ្នកសម្រេចបាននោះទេ។ តម្លៃខ្លួនអ្នកមាននៅក្នុងខ្លួនអ្នកស្រាប់ហើយ។
សូមអ្នកត្រិះរិះលើចំណុចទាំងនេះ។ ដើមឈើលូតលាស់តាមដំណើរធម្មជាតិរបស់វា ដោយមិនខ្វល់ពីទំហំរបស់វានោះទេ នៅពេលវាលូតលាស់។ វាធំឬតូចទៅតាមការលូតលាស់របស់វា។ ចំណែកព្រះចន្ទ និង ព្រះអាទិត្យវិញ មានតួនាទី និង ពេលវេលារះខុសគ្នា។ ព្រះចន្ទមិនបិទបាំងព្រះអាទិត្យទេ។ ព្រះចន្ទរះទៅតាមពេលវេលារបស់ខ្លួន។ សូម្បីតែមហាសមុទ្រ ទោះមានព្យុះសង្ឃរាបែបណា ក៏នៅតែជាមហាសមុទ្រដដែល។ ហេតុដូចនេះហើយ ហេតុអ្វីអ្នកចាំបាច់មានមន្ទិលទៅលើការឱ្យតម្លៃខ្លួនឯង?
តម្លៃខ្លួនអ្នកមិនមែនឋិតនៅលើស្នាដៃដែលអ្នកសម្រេចបាន ឬមិនឋិតលើការសរសើរ ឬការទទួលស្គាល់ពីអ្នកដទៃនោះទេ។ តម្លៃខ្លួនអ្នកកើតចេញមកពីអត្ថិភាពរបស់អ្នក ការខិតខំប្រឹងប្រែងអស់ពីសមត្ថភាពរបស់អ្នក ដើម្បីស្វែងយល់នូវអ្វីដែលថ្មីៗ និង ធ្វើឱ្យខ្លួនឯងរីកចម្រើនទៅមុខ។
តម្លៃខ្លួនអ្នកមិនមែនជាសំណួរដែលអ្នកត្រូវចោទសួរនោះទេ។ វាជាការពិតដែលខ្លួនអ្នកមានតម្លៃគ្រប់គ្រាន់។ សូមអ្នករស់នៅដោយមានភាពជឿចិត្តលើតម្លៃខ្លួនអ្នក បន្តព្យាយាមរៀនសូត្រ និង អភិវឌ្ឍន៍ខ្លួន។
ខ្ញុំសង្ឃឹមថាសារនេះផ្តល់ផលវិជ្ជមានដល់អ្នកនាពេលនេះ ហើយប្រសិនបើអ្នកយល់ថាសារនេះមានសារវន្ត សូមអ្នកចែកចាយបន្តដល់មនុស្ស ដែលត្រូវការរម្លឹកខ្លួនឯងនូវតម្លៃខ្លួនពួកគេ»៕
