កាលពីថ្ងៃទី ១៦ ខែកុម្ភៈ ឆ្នាំ ២០២៥ កន្លងទៅនេះ តារាកូរ៉េស្រី វ័យ ២៤ ឆ្នាំ Kim Sae Ron ត្រូវបានគេប្រទះឃើញស្លាប់នៅក្នុងផ្ទះតែម្នាក់ឯង ដោយសារតែការធ្វើអត្តឃាត ដែលដំណឹងនេះបានធ្វើឱ្យមហាជនអ្នកគាំទ្រមានការតក់ស្លុតយ៉ាងខ្លាំង។
យ៉ាងណាមិញ មហាជនអ្នកគាំទ្រមានការអាណិតខ្លាំងណាស់ចំពោះនាង ព្រោះតែកន្លងមក Kim Sae Ron បានប្រទះរឿងអាស្រូវមិនឈប់ ដែលធ្វើឱ្យនាងស្ទើរតែបាត់មុខពីសិល្បៈ។ ក្នុងនោះដែរ គេរឹតតែខ្លោចចិត្តទៅទៀត នៅពេលដែលមានព័ត៌មានទម្លាយថា Kim Sae Ron បានជំពាក់លុយក្រុមហ៊ុនផលិតកម្មចាស់របស់នាង គឺ រហូតដល់ ៧០០ លានវ៉ុន ដែលស្មើប្រមាណជាង ៥៣២ ០០០ ដុល្លារឯណោះ ទាក់ទងនឹងការផាកពិន័យ ក៏ដូចជាសំណងក្នុងរឿងដែលនាងបានបង្កគ្រោះថ្នាក់ចរាចរណ៍កាលពីឆ្នាំ ២០២២ កន្លងទៅ។
ដោយឡែក តាមព័ត៌មានបានឱ្យដឹងថា Kim Sae Ron បានសន្យានឹងរកប្រាក់មកសងខាងក្រុមហ៊ុនវិញ តែមួយរយៈក្រោយពីមានរឿង នាងមានការលំបាករឿងលុយកាក់កាន់តែខ្លាំងទៅ ជាពិសេសគឺការងារសិល្បៈរបស់នាងមិនសូវរលូនទៅមុខប៉ុន្មានទេ ទើបនាងសុំខាងក្រុមហ៊ុនពន្យារពេលជារឿយៗ។ លើសពីនេះទៀត មុននឹងនាងស្លាប់នេះ នាងក៏ឆ្លៀតធ្វើការនៅហាងកាហ្វេផងដែរ ដើម្បីរ៉ាប់រងលើការចំណាយប្រចាំថ្ងៃ ពោលគឺនាងពិតជាមានការលំបាកខ្លាំងណាស់ ហើយនេះក៏អាចជាមូលហេតុដែលនាងដាច់ចិត្តផ្តាច់ជីវិតខ្លួនឯងបែបនេះ៕
ប្រភព៖ Timesnownews
