ជឿជាក់ថា ប្រិយមិត្តតាមដានបណ្តាញសង្គមប្រាកដជាស្គាល់ វេជ្ជបណ្ឌិត និត ប៊ុនតុងយី ដែលលោកគឺជាសហស្ថាបនិក និង ជានាយកប្រតិបត្តិនៃ មីតដុកទ័រ (MeetDoctor) ដែលជាកម្មវិធីទូរស័ព្ទដៃ សម្រាប់ពិគ្រោះជំងឺតាមអនឡាញ។ ជារឿយៗវេជ្ជបណ្ឌិតរូបនេះ តែងធ្វើវីដេអូចែករំលែកចំណេះដឹងទាក់ទងនឹងសុខភាព និង សម្រស់ ហើយក៏ទទួលបានប្រជាប្រិយភាពគួរឱ្យកត់សម្គាល់ផងដែរ។
យ៉ាងណាមិញ ថ្មីៗនេះលោកបានបង្ហោះវីដេអូមួយ ដោយលើកសរសើរចំៗចំពោះភេទទី ៣ ដែលបានធ្វើឱ្យមហាជនលើបណ្តាញសង្គមគាំទ្រយ៉ាងខ្លាំង។ តាមរយៈការបកស្រាយ លោកបានលើកឡើងថា៖ «ភេទទី ៣ ឥលូវពូកែខ្លាំងមែនទែន បើតាមមើលឃើញ។ ហេតុអ្វីបានជាគាត់ពូកែ? ដោយសារពួកគាត់ឆ្លងកាត់ឧបសគ្គច្រើនជាងមនុស្សធម្មតា។ ឧបសគ្គអ្វីទៅ? ឧបសគ្គពេលនៅក្មេង គេបន្ទោសបង្អាប់គាត់ គេ Bully គាត់ តែគាត់នៅតែព្យាយាមធ្វើជាខ្លួនឯង។ ហើយនេះហើយជាភាពខ្លាំងរបស់គាត់មួយ»។
លោកបន្ថែមទៀតថា៖ «មួយទៀតពាក់ព័ន្ធនឹងភាពច្នៃប្រឌិតរបស់គាត់។ គាត់ហ៊ានសាកល្បងធ្វើរឿងជាច្រើន នៅពេលបទពិសោធគាត់មាន ភាពច្នៃប្រឌិតរបស់ពួកគាត់រឹតតែកើនឡើង។ តែយ៉ាងណាមិញ បញ្ហាផ្លូវចិត្តរបស់គាត់នៅតែប្រឈមអីចឹង ពីព្រោះ គេនៅតែបន្ត Bully គាត់។ បើសិនករណីនៅពេលគាត់មានបញ្ហាផ្លូវចិត្តណាមួយ ហើយស្តាប់ការ Bully គ្រប់ជ្រុងមកទៀត នោះគាត់អាចនឹងធ្លាក់ទៅវិបត្តិផ្លូវចិត្តមួយ។ ដូច្នេះហើយ យើងទាំងអស់គ្នាគួរតែ កុំរើសអើងភេទទី ៣ ហើយព្យាយាមយកគាត់ជាគំរូ ដើម្បីធ្វើជាខ្លួនឯងនៅក្នុងសង្គម»៕
