សារព័ត៌មាន CTWANT បានរាយការណ៍ពីរឿងរ៉ាវនារីជនជាតិតៃវ៉ាន់ម្នាក់ ដែលប្រកាសរកបុរសៗមកធ្វើជាសង្សារ ដើម្បីបន្លំភ្នែកញាតិមិត្តអ្នកជិតខាងក្នុងថ្ងៃចូលឆ្នាំចិន ដោយហ៊ានឱ្យដល់ខ្ទង់ពាន់ដុល្លារ ត្រឹមតែរយៈពេល ៣ ថ្ងៃ។
តាមព័ត៌មានបានឱ្យដឹងថា នារីរូបនេះមានវ័យ ៣៤ ឆ្នាំទៅហើយ ហើយនាងក៏ជាកូនទោលក្នុងគ្រួសារទៀត ទើបឪពុកម្ដាយនាងតែងតែរំអុកនាងជារឿយៗរឿងរៀបការ តែនាងនៅមិនទាន់ជួបនរណាម្នាក់ដែលត្រូវចិត្តនៅឡើយ។ ដូច្នេះហើយទើបថ្ងៃចូលឆ្នាំចិនខាងមុខនេះ នាងត្រូវការបុរសម្នាក់មកបន្លំធ្វើជាសង្សារបស់នាង ដើម្បីកុហកគ្រួសារញាតិមិត្តនៅឯស្រុក កុំឱ្យពួកគាត់ចេះតែរំអុកនាងខ្លាំងពេក។
តាមព័ត៌មានបានឱ្យដឹងថា នាងនឹងជួលបុរសម្នាក់ក្នុងតម្លៃ ២០០ ០០០ ដុល្លារតៃវ៉ាន់ ដែលស្មើប្រមាណជាង ៦ ០០០ ដុល្លារ ក្នុងរយៈពេល ៣ ថ្ងៃ ហើយនាងឱ្យធីបចំនួន ៥០ ០០០ ដុល្លារតៃវ៉ាន់ ឬស្មើប្រមាណ ១ ៥០០ ដុល្លារទៀត បើសិនជាអ្នកនោះធ្វើឱ្យឪពុកនាងស្រឡាញ់ចូលចិត្តបាន។ នាងក៏មានលក្ខខណ្ឌដែរថា បុរសនោះមានកម្ពស់មិនលើសពី ១៧៥ សង់ទីម៉ែត្រ មិនបាច់ស្អាតសង្ហា ឬក៏មានឋានៈអ្វីទេ សុំត្រឹមមានរូបរាង និង សុខភាពមាំទាំ ជាពិសេសគឺចេះបន្លំធ្វើចរិតសុភាពរាបសារ ហើយពេលទៅដល់ស្រុកត្រូវគេងបន្ទប់ជាមួយនាង តែត្រូវគេងនៅលើអិដ្ឋ៕
ប្រភព៖ Kapook
