ជាការពិតណាស់ កន្លងមកមហាជនធ្លាប់បានឃើញមកហើយនូវការរៀបចំកម្មវិធីសប្បុរសធម៌តាមរយៈការរត់ ការជិះកង់ និង មធ្យោបាយផ្សេងៗពីសំណាក់សប្បុរសជន និង សិល្បករ សិល្បការិនីនានា ដើម្បីជួយដល់សង្គម។ យ៉ាងណាមិញ ថ្មីៗនេះ បវរកញ្ញាកម្ពុជា កញ្ញា កុយ អេនណា បានធ្វើឱ្យមហាជនភ្ញាក់ផ្អើលយ៉ាងខ្លាំង ខណៈនាងបានប្រកាសនូវដំណឹងរៀបចំកម្មវិធីសប្បុរសធម៌ តាមរយៈការដើរទៅកាន់ខេត្តសៀមរាប។
តាមសេចក្តីជូនដំណឹងរបស់ បវរកញ្ញា កុយ អេនណា បានឱ្យដឹងថា កញ្ញា នឹងរៀបចំកម្មវិធីសប្បុរសធម៌ដើម្បីរៃអង្គាសថវិកា សម្រាប់ជួយដល់កុមារ និង ជនពិការក្នុងសហគមន៍ ព្រមទាំងសាងសង់សាលារៀនផងដែរ។ មិនត្រឹមតែប៉ុណ្ណោះ កម្មវិធីនេះដែរ កញ្ញា កុយ អេនណា ក៏ធ្វើឡើង ដើម្បីចូលរួមលើកកម្ពស់ពីវិស័យទេសចរណ៍ចាប់ពីទីក្រុងភ្នំពេញ ដល់ខេត្តសៀមរាប។
កញ្ញា កុយ អេនណា បានឱ្យដឹងថា ការធ្វើដំណើរដើរទៅកាន់ខេត្តសៀមរាបរបស់កញ្ញា នឹងចាប់ផ្តើមនៅថ្ងៃទី ០៤ ខែកញ្ញា ឆ្នាំ ២០២៥ ខាងមុខនេះ រហូតដល់ខេត្តសៀមរាប។ ក្នុងនោះ បើតាមការឆ្លើយតបរបស់កញ្ញា កុយ អេនណា ទៅកាន់អ្នកគាំទ្របានឱ្យដឹងថា កញ្ញា នឹងដើររយៈចម្ងាយប្រមាណជាង ៣០០ គីឡូម៉ែត្រ៕
