កាលពីដើមខែមករា ឆ្នាំ ២០២៥ កន្លងទៅនេះ វេបសាយ afamily បានរាយការណ៍ពីពិធីមង្គលការមួយក្នុងប្រទេសវៀតណាម ដែលគេចាត់ទុកជាមង្គលការដ៏ធំ និង វាបានបង្កការភ្ញាក់ផ្អើលយ៉ាងខ្លាំងក្នុងបណ្ដាញសង្គម។ ជាមួយនឹងពិធីមង្គលការដ៏អស្ចារ្យនោះ ត្រូវបានគេដឹងថា កូនក្រមុំ គឺជាកូនស្រីរបស់ម្ចាស់ក្រុមហ៊ុនសំណង់ដ៏ធំមួយនៅក្នុងខេត្ត Heu Giang។ រីឯកូនកំលោះ គឺជាកូនរបស់ម្ចាស់ហាងមាសដ៏ល្បីមួយក្នុងខេត្ត Can Tho ប្រទេសវៀតណាម។
គូស្នេហ៍ថ្មីថ្មោងនេះ ត្រូវបានមហាជនវៀតណាមលើកសរសើរថាជាគូដ៏ស័ក្តិសមបំផុត និង ទទួលបានការជូនពរព្រោងព្រាត ព្រោះម្នាក់ៗស្រស់ស្អាត និង ស្រស់សង្ហាខ្លាំង។ ក្នុងនោះក៏មានការសរសើរដល់ការរៀបចំក្នុងពិធីមង្គលការនេះដែរ ហើយអ្វីដែលកាន់តែធ្វើឱ្យមហាជនវៀតណាមលើកសរសើរ និង ភ្ញាក់ផ្អើលខ្លាំងលើសនេះទៀតនោះ គឺថ្លៃបណ្ណាការដែលម្តាយកូនកំលោះយកជូនកូនក្រមុំ ដោយមានចំនួនច្រើនលើសលប់ និង មានតម្លៃមហាសាល។
តាមព័ត៌មានបានបង្ហាញឱ្យដឹងថា បណ្ណាការដែលម្តាយកូនកំលោះបានរៀបចំដើម្បីស្វាគមន៍កូនប្រសាស្រី គឺមានប័ណ្ណកម្មសិទ្ធិសណ្ឋាគារមួយកន្លែងនៅកណ្តាលខេត្ត Can Tho ជាមួយនឹងវិមានតម្លៃ ១៩ ពាន់លានដុង (ប្រហែលជាង ៧០ ម៉ឺនដុល្លារ)។
ក្នុងនោះក៏មានថ្លៃបណ្ណាការជាសាច់ប្រាក់ចំនួន ៦០០ លានដុង (ប្រហែលជាង ២ ម៉ឺនដុល្លារ) មាសសុទ្ធ ១០០ ដុំ និង គ្រឿងអលង្ការមាស ពេជ្រ ជាច្រើនឈុតទៀត ដោយសរុបរួមទាំងតម្លៃបណ្ណាការ និង អំណោយពីម្តាយកូនកំលោះ គឺមានប្រហែល ៥០ ពាន់លានដុង (ប្រហែលជិត ២ លានដុល្លារ)។
គួរឱ្យដឹងដែរថា សម្រាប់ពិធីមង្គលការនេះបានធ្វើឡើងនៅផ្ទះកូនក្រមុំ ហើយនៅក្នុងពិធីទាំងមូលគឺបានរៀបចំយ៉ាងធំ និង ប្រណីតតាមបែបលោកខាងលិច អមដោយការតុបតែងផ្កាស្រស់ពណ៌ក្រហមឆ្អិនឆ្អៅ ស័ក្តិសមនឹងឋានៈគ្រួសារទាំងសងខាងទៀតផង៕
ប្រភព ៖ Kapook, afamily
