ជារឿងដ៏គួរឱ្យភ្ញាក់ផ្អើល នៅវេលាម៉ោង ១:០០ នាទី ថ្ងៃទី ១៣ ខែកុម្ភៈ ឆ្នាំ ២០២៥ មានករណីបុរសម្នាក់បានជិះម៉ូតូទៅកាប់សង្សាររបស់ខ្លួននៅកន្លែងធ្វើការ នៅហាងចរណៃ ស្ថិតនៅតាមបណ្តោយផ្លូវជាតិលេខ ១ ភូមិក្បាលជ្រោយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ បណ្ដាលឱ្យរងរបួសធ្ងន់បញ្ជូនទៅកាន់មន្ទីរពេទ្យ រួចរូបគេបានជិះម៉ូតូទៅលោតទឹកពីលើស្ពានព្រែកសំរោង តែមិនស្លាប់ ដោយសារមានទូកនេសាទជួយសង្គ្រោះទាន់ពេលវេលា។
ទាក់ទិនទៅនឹងរឿងនេះ តាមរយៈប្រភពព័ត៌មានបានឱ្យដឹងថា ជនសង្ស័យមានឈ្មោះ ភ័ក្រ្ត សុវណ្ណារ៉ា ភេទប្រុស អាយុ ២១ ឆ្នាំ ជនជាតិខ្មែរ ជាកម្មកររោងចក្រ ស្នាក់នៅភូមិចុងព្រែក សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។ ជនរងគ្រោះមានឈ្មោះ វែង ស្រីឡែន ភេទស្រី អាយុ ១៧ ឆ្នាំ ជនជាតិខ្មែរ បុគ្គលិកហាងចរណៃ ស្នាក់នៅភូមិដើមស្លែង សង្កាត់ច្បារអំពៅ ២ ខណ្ឌច្បារអំពៅ រាជធានីភ្នំពេញ។
ដោយយោងតាមរបាយការណ៍របស់សមត្ថកិច្ច បានឱ្យដឹងថា កាលពីអំឡុងឆ្នាំ ២០២៣ ជនរងគ្រោះ និង ជនសង្ស័យមានទំនាក់ទំនងស្នេហានឹងគ្នា ហើយជនសង្ស័យក៏ឱ្យជនរងគ្រោះទៅរស់នៅជាមួយគ្នានៅផ្ទះជនសង្ស័យ តែជនរងគ្រោះមិនព្រម ទើបមានទំនាស់ពាក្យសម្តីនឹងគ្នា ពេលនោះជនសង្ស័យគំរាមជនរងគ្រោះថា បើចង់បែកពីខ្ញុំមានអ្នកថ្មី ខ្ញុំនឹងកាប់សម្លាប់ចោល។
រហូតដល់ថ្ងៃទី ១៣ ខែកុម្ភៈ ឆ្នាំ ២០២៥ វេលាម៉ោង ១:០០ នាទី រសៀល ជនរងគ្រោះកំពុងធ្វើការនៅក្នុងហាង ក៏ត្រូវបានជនសង្ស័យទាក់ទងទូរស័ព្ទទៅ ២ ដង តែជនរងគ្រោះមិនលើកនិយាយ ធ្វើឱ្យជនសង្ស័យខឹង ជិះម៉ូតូទៅឈប់មុខហាងចាប់ទាញជនរងគ្រោះមកក្រៅ រួចយកកាំបិតប៉័ងតោកាប់ជនរងគ្រោះត្រូវចំក្បាល និង កាប់ជើងឆ្វេងដាច់ឆ្អឹង (របួសធ្ងន់) រួចជិះម៉ូតូគេចឡើងលើស្ពានព្រែកសំរោងដើម្បីលោតទឹកសម្លាប់ខ្លួន តែមិនស្លាប់ ដោយសារមានប្រជានេសាទជួយទាន់ពេលវេលា។
ក្រោយកើតហេតុ ជនរងគ្រោះត្រូវបានក្រុមគ្រួសារនាំទៅព្យាបាលនៅមន្ទីរពេទ្យមិត្តភាព ខ្មែរ-សូរវៀត ហើយសមត្ថកិច្ចរកឃើញវត្ថុតាងកាំបិតប៉័ងតោ ១, ម៉ូតូ ១ គ្រឿង (របស់ជនសង្ស័យ) និង បាន ឃាត់ខ្លួនជនសង្ស័យខាងលើយកទៅសួននាំនៅអធិការនគរបាលខណ្ឌច្បារអំពៅ ដើម្បីចាត់ការនីតិវិធីតាមផ្លូវច្បាប់៕
ប្រភព ៖ CNC
