រូបភាពថ្មី ក្រោយឈ្នះមកុដ MU របស់នាង Sheynnis កំពុងត្រូវអ្នកគាំទ្របវរកញ្ញាថៃមួយចំនួនសើចបង្អាប់

បន្ទាប់ពីការប្រកួតសម្រស់ដ៏ធំលំដាប់ពិភពលោក Miss Universe 2023 បានបញ្ចប់ទៅ និង រកឃើញម្ចាស់មកុដបានទៅលើប្រទេស Nicaragua នាង Sheynnis Palacios និង លំដាប់រងទី ១ បានទៅលើបវរកញ្ញាប្រទេសថៃនាង Anntonia Porsild មកគេឃើញថាអ្នកគាំទ្រថៃមួយចំនួនកើតក្តីមិនពេញចិត្ត ស្រែកតវ៉ាបង្ហោះអារម្មណ៍ថាមិនយុត្តិធម៌ពាសពេញបណ្ដាញសង្គមហ្វេសប៊ុក និង បណ្ដាញសង្គមនានា។

តួយ៉ាង កាលពីថ្ងៃទី ២០ ខែវិច្ឆិកា ឆ្នាំ ២០២៣ កន្លងទៅ គេឃើញថាមានអ្នកគាំទ្របវរកញ្ញាថៃមួយចំនួនបានចូលទៅបញ្ចេញមតិសើចចំអករិះគន់ចំពោះនាង Sheynnis Palacios ដែលជាម្ចាស់មកុដ​ Miss Universe 2023 ដោយរូបភាពទាំងនោះកញ្ញា Sheynnis Palacios បានឈរថតកាច់រាង ពេលបំពេញតួនាទីថ្ងៃដំបូង ខណៈមុខមាត់ពុំសូវជាបាន Make Up ខ្លាំងនោះទេ។

ជាមួយនឹងរូបភាពទាំងនោះ គេឃើញមានគណនីហ្វេសប៊ុកអ្នកគាំទ្របវរកញ្ញាថៃមួយចំនួនបានយកទៅបង្ហោះជាមួយពាក្យឡកឡាយពីរូបសម្រស់បវរកញ្ញាចក្រវាលថ្មីរូបនេះ បន្ទាប់មកក៏មានអ្នកគាំទ្រមួយចំនួនចូលទៅបញ្ចេញមតិតែស្ករតាមគ្នាដោយសរសើរពីសម្រស់ក្នុងអត្ថន័យបង្អាប់ និង សើចចំអក ព្រមទាំងចុច Reaction Sticker សើច និង យំព្រោងព្រាត៕