ត្រលប់មកវិញលើកនេះ Step សង្ហាមាឌមាំជាងមុន តាមពិតសំងំធ្វើរឿងទាំងនេះសោះ!

បាត់មុខប្រហែលមួយឆ្នាំ សុខៗ Step វិលវិញ សម្ពោធផលិតកម្មថ្មីជាមួយតារាចម្រៀងស្រី SK ដែលធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំង។ ជាក់ស្តែង លោកបានបង្ហាញខ្លួនជា​តារាចម្រៀងប្រចាំផលិតកម្ម GenMusix ដែលជាផលិតកម្មថ្មីសន្លាងផ្តោតលើយុវវ័យ ហើយក៏ជាផលិតកម្មបុត្រសម្ព័ន្ធរបស់ក្រុមហ៊ុនតន្ត្រីលេខ១នៅកម្ពុជា «ហង្សមាស» ផងដែរ។

នៅថ្ងៃសម្ពោធ Step បានបង្ហាញខ្លួនជាមួយការបញ្ចេញបទចម្រៀងមួយបទចំណងជើង «កាឡកណ្ណី» ដែលនៅក្នុងបទនេះមើលទៅការសម្តែងមានភាពទាក់ទាញខ្លាំង ឈុតឆាករៀបចំបែបជប៉ុន និងមានការចាប់ប្លង់ពីមួយទៅមួយមានគុណភាពដូចក្នុងរឿងហូលីវូដ។ អ្វីកាន់តែគួរឱ្យចាប់អារម្មណ៍ទៀតនោះ Step បង្ហាញខ្លួនលើកនេះមើលទៅសង្ហាប្លែក រាងមាំជាងមុន សាច់ដុំកក់ៗ សូម្បីតែឃើញនៅខាងក្រៅក៏មិនធម្មតាផងដែរ។

បើតាមជំនួបជាមួយ ប្រជាប្រិយ ផ្ទាល់ Step បានខ្សឹបប្រាប់ថា បាត់មួយឆ្នាំនេះ តាមពិតលោកសំងំហាត់​ប្រាណ​​យក​រា​ងដើម្បីចង់ឱ្យ​ពេលចេញមកវិញមានអ្វីដែលថ្មីហើយប្លែក។ ក្រៅពីការហាត់ប្រាណ លោកក៏រវល់នឹងការងារជាច្រើនជាមួយក្រុមការងារ​មិនថាការច្រៀង​ ការថត និងរកគំនិតថ្មីៗដើម្បីផលិតចម្រៀងសម្រាប់ផលិតកម្មនេះ។ លោកប្រាប់ទៀតថាបទចម្រៀង​បានថតរួចរាល់ច្រើនគួរសម តែសម្រាប់ការបញ្ចេញបទបន្ថែមគឺអាស្រ័យទៅលើថ្នាក់លើជាអ្នកចាត់ចែង។ លោកថាបទចម្រៀងដែលត្រៀម លោកបានបញ្ចូលគំនិតច្រើន តែយ៉ាងណាក៏បានពិភាក្សា​ជាមួយក្រុមការងារដើម្បីបានគំនិតគោលផងដែរ។

ពេលបានឃើញ MV ថ្មីរបស់ខ្លួន Step ថាលោកមានអារម្មណ៍ពិតជារំភើប ព្រោះនេះជាអ្វីដែលលោករង់ចាំយូរមកហើយ។ លោកថា៖ «ខ្ញុំសប្បាយចិត្តបំផុត ព្រោះខ្ញុំបានធ្វើអ្វីដែលខ្ញុំចូលចិត្ត នេះគ្រាន់តែជាការចាប់ផ្តើមប៉ុណ្ណោះ»៕