ថាមែនៗ! អ្នកគាំទ្រចាប់បានភស្ដុតាងច្បាស់ៗថា ពេជ្រ សិរីរ័ត្ន និង អេឡិច ចាន់ត្រា អាចលើសពីមិត្ត
មួយរយៈចុងក្រោយនេះ មហាជនអ្នកប្រើប្រាស់បណ្ដាញសង្គម ជាពិសេសប្រិយមិត្តដែលតែងតាមដានជីវិតឯកជនរបស់អ្នកសិល្បៈ ហាក់នាំគ្នាចាប់អារម្មណ៍កាន់តែខ្លាំងទៅលើសកម្មភាពស្និទ្ធស្នាលរវាងពិធីការិនីរូបស្រស់ ពេជ្រ សិរីរ័ត្ន និង តារាចម្រៀង អេឡិច ចាន់ត្រា ដោយមានការសង្ស័យថា ពួកគេមានទំនាក់ទំនងស្នេហាជាមួយគ្នា។
ជាការពិត តារាប្រុសស្រីដ៏ស័ក្ដិសមមួយគូនេះ កាន់តែបង្ហាញភាពស្និទ្ធស្នាលផ្អែមល្ហែមដាក់គ្នាខ្លាំងឡើងរាល់ថ្ងៃ ហើយតែងបណ្ដើរគ្នាទៅណាមកណាសឹងមិនឃ្លាតមួយជំហាន លើសពីនេះ ពួកគេតែងចែករំលែកភាពល្អូកល្អិនដូចគូស្នេហ៍នោះ បង្ហោះនៅលើបណ្ដាញសង្គមជារឿយៗ តែទោះជាបែបនេះ ទាំង អេឡិច ចាន់ត្រា និង អ្នកនាង ពេជ្រ សិរីរ័ត្ន បានត្រឹមហៅគ្នាថាមិត្តៗប៉ុណ្ណោះ។
ដោយឡែកស្រាប់តែនៅថ្ងៃទី ២៦ ខែឧសភា ឆ្នាំ ២០២៣ កន្លងទៅ អ្នកនាង ពេជ្រ សិរីរ័ត្ន បានបង្ហោះរូបថតទាក់ទាញមួយប៉ុស្ដិ៍នៅលើហ្វេសប៊ុក ហើយដាក់ Caption ចង់មានស្នេហា។ ភ្លាមនោះ ស្រាប់តែតារាចម្រៀង ករុណា ពេជ្រ ដែលជាមិត្តស្និទ្ធស្នាលក្នុងពិភពសិល្បៈជាមួយគ្នា បានចូលទៅបញ្ចេញយោបល់ថា ៖ «ចុះ Alex ទុកនៅណាស៊ីស ទុកវានៅ OK មែន» ក្នុងនោះ អ្នកនាង ពេជ្រ សិរីរ័ត្ន ក៏បានឆ្លើយតបវិញថា ៖ «ទុកម្ដុំ ផ្ញើសិន»។
ពាក្យសម្ដីឆ្លើយឆ្លងរវាងតារាប្រុសស្រីទាំងពីរដួងនេះ ហាក់ជាភស្ដុតាងបញ្ជាក់កាន់តែច្បាស់ ធ្វើឱ្យអ្នកគាំទ្រយល់ថា រវាង អ្នកនាង ពេជ្រ សិរីរ័ត្ន និង អេឡិច ចាន់ត្រា មានទំនាក់ទំនងលើសពីមិត្តធម្មតា៕
