បងប្រុសដ៏ល្អ! ជី ដេវីត ពោលពាក្យយ៉ាងមានន័យ ក្នុងថ្ងៃប្អូនស្រីទទួលសញ្ញាបត្រ

ក្នុងនាមជាបងប្រុសល្អម្នាក់ហ៊ានលះបង់សឹងគ្រប់បែបយ៉ាង ទាំងថវិការ​ ទាំងពេលវេលា ជាពិសេសគឺការសិក្សារបស់ខ្លួនឯង ដើម្បីចេញរកប្រាក់ផ្គត់ផ្គង់គ្រួសារ ជាពិសេសឱ្យប្អូនស្រីបានរៀបចប់ចុងចប់ដើម លោក ងួន ចាន់ដេវីត ឬ លោក ជី ដេវីត បានធ្វើឱ្យមហាជនមិនតិចនោះទេស្ញើចសរសើរ ពីទឹកចិត្ត ក្ដីស្រឡាញ់ដ៏ធំមហិមារបស់ខ្លួនទៅលើប្អូនស្រីរបស់លោក។

ជាក់ស្ដែង កាលពីថ្ងៃទី ២៤ ខែឧសភា ឆ្នាំ ២០២៣ កន្លងទៅ គឺជាថ្ងៃទទួលសញ្ញាបត្របញ្ចប់ថ្នាក់បរិញ្ញាបត្រ របស់និស្សិតនៃសាកលវិទ្យាល័យភូមិន្ទវិចិត្រសិល្បៈ។ ជាមួយគ្នានោះ កញ្ញា ងួន ចាន់ដារីយ៉ា ដែលគេស្គាល់ថាជាប្អូនស្រីបង្កើតតែមួយគត់របស់តារាចម្រៀង ជី ដេវីត ក៏បានទៅទទួលសញ្ញាបត្រនាថ្ងៃនោះផងដែរ។

រីឯលោក ជី ដេវីត ឯណោះវិញ ក៏បានបង្ហាញពីអារម្មណ៍ដ៏រំភើប និង មោទកភាពចំពោះប្អូនស្រីដែលបានបញ្ចប់ការសិក្សាយ៉ាងជោគជ័យ ដោយបានបង្ហោះរូប ព្រមទាំងរៀបរាប់ពីអារម្មណ៍ក្នុងចិត្តចូលទៅក្នុងគណនីហ្វេសប៊ុកផេកផ្លូវការរបស់លោកថា ៖ «ក្នុងថ្ងៃនេះ ប្អូនស្រីរបស់ខ្ញុំបានទទួលសញ្ញាបត្របញ្ចប់ថ្នាក់បរិញ្ញាបត្រនៅមហាវិទ្យាល័យបុរាណវិទ្យា  ឯកទេស បុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ។ ក្តីស្រមៃរបស់ខ្ញុំកាលពី ១២ ឆ្នាំមុន ត្រូវបានសម្រេចជាច្រើននៅក្នុងឆ្នាំនេះ។ ខ្ញុំត្រូវកំណត់គោលដៅថ្មីទៀតសម្រាប់ជំនាន់ក្រោយ»។

មិនតែប៉ុណ្ណោះ លោកក៏បានបន្ថែមឃ្លាខ្លី តែខ្លឹមយ៉ាងមានអត្ថន័យទៀតថា ៖ «ក្នុងនាមខ្ញុំ ជាបងប្រុស ជាឳពុកជាម្តាយផង I’m so Proud of you My Dariya»៕