ផ្លូវការហើយ! តួប្រុសស្រីប្រចាំរឿង «Glory» Lee Do Hyun និង Lim Ji Yeon កំពុងទាក់ទងស្នេហាគ្នា
គ្រាន់តែបើកឆាកស្វាគមន៍ខែថ្មីភ្លាម សារព័ត៌មានកូរ៉េ Dispatch បានទម្លាយរូបភាពជាច្រើនសន្លឹកដែលពួកគេចាប់បានថា តារាសម្ដែងក្នុងរឿង «Glory» ពោលគឺតារាប្រុស Lee Do Hyun និង តារាស្រី Lim Ji Yeon កំពុងមានទំនាក់ទំនងស្នេហាជាមួយគ្នា ក្រោយពួកគេចាប់បានភស្តុតាងជាច្រើន។
ផ្ទុះចចាមអារ៉ាមមិនទាន់បានប៉ុន្មានផង ស្រាប់តែនៅថ្ងៃទី ០១ ខែមេសា ឆ្នាំ ២០២៣ នេះ ក្រុមហ៊ុន Artist Company របស់តារាស្រី Lim Ji Yeon បានឆ្លើយតបទៅនឹងសារព័ត៌មាន Dispatch អំពីទំនាក់ទំនងស្នេហារបស់សិល្បករពួកគេ ដោយបានរៀបរាប់ថា ៖ «Lim Ji Yeon និង Lee Do Hyun បានចាប់ផ្ដើមពីមិត្តរួមការងារ រហូតឈានមកដល់ដំណាក់កាលមើលចិត្តគ្នា ហើយពួកគេកំពុងមានអារម្មណ៍ល្អជាមួយគ្នា»។
ជាមួយគ្នានោះ ខាងក្រុមហ៊ុនក៏បានបន្ថែមថា ៖ «ពួកយើងនឹងអរគុណ ហើយសិល្បកររបស់យើងនឹងសប្បាយចិត្ត ប្រសិនបើអ្នកទាំងអស់គ្នាស្វាគមន៍ទំនាក់ទំនងរបស់ពួកគេទាំង ២ យ៉ាងកក់ក្តៅ»។
ទន្ទឹមនឹងនោះ ខាងក្រុមហ៊ុនរបស់ Lee Do Hyun គឺ Yuehua Entertainment ក៏បានប្រកាសស្រដៀងគ្នាដែរថា ៖ «បន្ទាប់ពីបានស្គាល់គ្នាមួយរយៈក្នុងនាមជាមិត្តរួមការងារជិតស្និទ្ធ ពួកគេទាំងពីរក៏បានចាប់អារម្មណ៍គ្នាទៅវិញទៅមក ហើយពួកគេក៏ចាប់ផ្តើមមើលចិត្តថ្លើមគ្នាដោយមានភាពប្រយ័ត្នប្រយែងជានិច្ច»៕
