ថ្លៃកប់ពពក! ទម្លាយតម្លៃផ្ទះដែល Song Joong Ki ត្រៀមរស់នៅជាមួយកូន និងភរិយាថ្មី
កាលពីថ្ងៃទី ៣០ ខែមករា ឆ្នាំ ២០២៣ កន្លងទៅ មហាជនអ្នកគាំទ្រជាច្រើនភ្ញាក់ផ្អើលជាខ្លាំង ដោយតារាសម្ដែងប្រុស Song Joong Ki បានប្រកាសថាខ្លួននឹងចូលរោងការជាមួយនឹងនាង Katy ដែលជាសង្សារថ្មីរបស់ខ្លួន ព្រមទាំងប្រកាសថាពួកគេកំពុងតែត្រៀមស្វាគមន៍កូនដំបូងផងដែរ។
ទោះបីជារឿងដ៏ក្ដៅគគុកមួយនេះ បានរំលងផុតប៉ុន្មានថ្ងៃទៅហើយក្ដី ក៏នៅតែមានមហាជនជាច្រើន នៅតែតាមដាន ចង់ដឹងចង់ឮបន្ថែមទៀតថាទៅជាយ៉ាងណា។
ដោយឡែក ថ្មីៗនេះមានបណ្ដាសារព័ត៌មានបរទេស ព្រមទាំងរបាយការណ៍ និង អ្នកនិយមលេងអ៊ីនធើណេតបានវែកញែករឿងរ៉ាវអំពីលំនៅដ្ឋានថ្មីរបស់ Song Joong Ki និង Katy ដែលជាប្រភេទផ្ទះ Penthouse ក្នុងយូនីត ១០៦-៧ នៃខាងក្នុងអគារ Eterno Cheongdam ស្ថិតនៅក្នុងតំបន់ Gangnam ទីក្រុង សេអ៊ូល ប្រទេសកូរ៉េខាងត្បូង។ សូមបញ្ជាក់ថា ប្រភេទផ្ទះ Penthouse គឺជាផ្ទះដ៏ប្រណីតធំមួយ ស្ថិតនៅជាន់ខ្ពស់ជាងគេនៃអគារ ហើយជាធម្មតា ផ្ទះបែបនេះ គឺបំពាក់សម្ភារយ៉ាងទំនើបៗ។
បើក្រឡេកទៅមើលតម្លៃផ្ទះរបស់អ្នកទាំងពីរ ដែលត្រៀមរស់នៅសម្រាប់សាងគ្រួសារថ្មីនោះ មានតម្លៃរហូតដល់ទៅ ១៥ ពាន់លានវ៉ុន ឬ ស្មើនឹងប្រមាណជាង ១២ លានដុល្លារឯណោះ។
គួរឱ្យដឹងផងដែរថា បច្ចុប្បន្ននេះ Song Joong Ki និង ភរិយាថ្មី កំពុងតែរស់នៅក្នុងគេហដ្ឋាន ដែលមានតម្លៃ ២០ ពាន់លានវ៉ុន ក្នុងទីក្រុង Itaewon នៅឡើយទេ ហើយទីនោះក៏ មានឪពុកម្តាយរបស់ភរិយាលោករស់នៅជាមួយផងដែរ៕
