ផ្ទុះការវែកញែក ក្រោយឃើញតួយក្ស កាណាសូ ក្នុងរឿង «នាងកែវមុខសេះ» ទ្រង់គ្រឿងបុរាណបែបនេះ

កាលពីពេលថ្មីៗនេះ ស្ថានីយទូរទស្សន៍ល្បីមួយបានបញ្ចេញនូវរឿងភាគបុរាណថ្មីរបស់ខ្លួនដែលមានចំណងជើងថា «នាងកែវមុខសេះ» ដែលនឹងត្រៀមបញ្ចាំងនៅពេលខាងមុខដ៏ខ្លីនេះ ជាមួយគ្នានឹងការបញ្ចេញនូវឈុតខ្លី និង រូបភាពខ្លះៗនៃរឿងដ៏គួរឱ្យចាប់អារម្មណ៍ដល់មហាជនផងដែរ។

ទន្ទឹមនឹងការបញ្ចេញឈុតខ្លី និង រូបភាពតួក្នុងរឿង មហាជនហាក់ចាប់អារម្មណ៍ចំពោះរូបភាពមួយសន្លឹករបស់តួអង្គយក្ស កាណាសូ ដែលសម្ដែងដោយតារាប្រុស ភួង សាវតា។ ជុំវិញរូបភាពនោះ មហាជនហាក់ផ្ទុះការវិភាគវែកញែកទៅកាន់ក្រុមការងារដឹកនាំរឿង ដោយគេបានលើកឡើងថាមានការតុបតែងខ្លួនឱ្យតួខុសបច្ចេកទេស ពោលគឺគេឃើញតារាប្រុសខាងលើ បានពាក់សង្វារដាក់នូវស្លឹកពោធិ៍បញ្ច្រាស ហាក់ខុសពីក្បួនខ្នាតសិល្បៈបុរាណ។

មិនត្រឹមតែមានមហាជនទូទៅប៉ុណ្ណោះទេ ដែលផ្ទុះការវិភាគវែកញែកសូម្បីហ្វេសប៊ុកផេកវប្បធម៌មួយដែលមានឈ្មោះថា បុរាណចារ្យ ក៏បានបញ្ចេញមតិយោបល់ផងដែរថា ៖ «គួរឱ្យខ្លាចមែនតើ ពាក់សង្វារ ស្លឹកពោធិ៍ដាក់បញ្ច្រាស»។ យ៉ាងណាមិញ បន្ទាប់ពីផ្ទុះការវែកញែកពេញបណ្ដាញសង្គមហ្វេសប៊ុកមក ខណៈនេះគេក៏ពុំទាន់ឃើញមានការចេញមុខបកស្រាយអ្វីនៅឡើយទេ៕