ក្តីសុខពេញទី! ភរិយាពពោះតែ ៣ ដង លោក ជុំ ស៊ីថា ទទួលបានកូនប្រុសស្រី ៥ នាក់យ៉ាងរំភើយ

ក្រោយពីបាត់មុខក្នុងវិស័យសិល្បៈ និង បានបើកចំហពីជីវិតឯកជនដ៏មានសុភមង្គលរបស់ខ្លួនហើយនោះ អតីតតារាសម្តែង និង បង្ហាញម៉ូដ ជុំ ស៊ីថា ក៏ហាក់កាន់តែទទួលបានសុភមង្គលយ៉ាងខ្លាំងក្នុងជីវិតគូរបស់លោក ។ លើសពីនោះ តារាប្រុសរូបក៏មានសេចក្តីសុខយ៉ាងខ្លាំងនៅពេលក្លាយទៅជាស្វាមី និង លោកប៉ា ដែលកំពុងមើលថែកូនៗដល់ទៅចំនួន ៥ នាក់នោះ ។

យ៉ាងណាមិញ ក្រោយពីចងចំណងស្នេហ៍រៀបការនឹងភរិយាដ៏ស្រស់ស្អាតហើយនោះ មហាជនអ្នកគាំទ្រ ជាពិសេសមិត្តក្នុង និង ក្រៅរង្វង់សិល្បៈ បាននាំគ្នាលួចសរសើរពីជីវិតរបស់តារាប្រុសរូបនេះយ៉ាងខ្លាំង ក៏ព្រោះបច្ចុប្បន្នលោកកំពុងតែមានមុខងារក្នុងស្ថាប័នរដ្ឋាភិបាល ព្រមទាំងមានមុខជំនួញធំៗក្នុងដៃជាច្រើនជាមួយនឹងភរិយា ។

បើទោះជាមានវ័យជាង ៣០ ឆ្នាំប៉ុណ្ណោះ លោក ជុំ ស៊ីថា ទទួលបានចំណងដៃកូនប្រុស ២ នាក់ និង ស្រីចំនួន ៣ នាក់ហើយ ដោយក្នុងនោះ ភរិយារបស់លោកពពោះ និង ត្រូវសម្រាលកូនតែ ៣ ដងប៉ុណ្ណោះ ពោលគឺលើកទី ១ គឺសម្រាលបានកូនស្រីច្បង បច្ចុប្បន្នមាននេះមានអាយុប្រមាណ ១០ ឆ្នាំ លើកទី ២ សម្រាលបានកូនស្រីមួយរូបទៀត មានអាយុ ១ ឆ្នាំកន្លះ និង សម្រាលលើកទី ៣ ទទួលបានកូនភ្លោះ ៣ នាក់ គឺ ប្រុស ២ នាក់ និង ស្រី ១ នាក់ ៕