គ្មានកាដូខួបកំណើតពីស្វាមីដូចឆ្នាំមុន នៅ សូនីតា មិនតូចចិត្តទេ តែសុំត្រឹមរឿងសំខាន់នេះ

ក្រោយពីបញ្ចប់ភាពនៅលីវ តារាសម្ដែង នៅ សូនីតា កំពុងរស់នៅសោយសុខក្នុងគ្រួសារតូចរបស់នាង ដែលមានស្វាមីផ្ដល់ក្ដីស្រឡាញ់ ភាពកក់ក្ដៅ ជាជំហរដ៏រឹងមាំសម្រាប់គ្រួសារ ថែមទាំងមានកូនប្រុសដ៏គួរឱ្យស្រឡាញ់ម្នាក់ជាកម្លាំងចិត្តដ៏ធំធេងទៀតផង ។ ជារឿយៗ តារាស្រីរូបនេះតែងបង្ហាញរូបថតស្ដែងពីសុភមង្គលក្នុងគ្រួសារ ព្រមជាមួយពាក្យសម្ដីផ្អែមល្ហែមលើកសរសើរពីស្វាមីមិនដាច់ពីមាត់ ។

ដោយឡែក បើក្រឡេកមកមើលថ្ងៃកំណើតរបស់ នៅ សូនីតា នៅក្នុងថ្ងៃទី ៣០ ខែមិថុនា ឆ្នាំ ២០២១ នេះ អ្នកនាងត្រូវបានមហាជនអ្នកលេងបណ្តាញសង្គមហ្វេសប៊ុកជាច្រើនបានចូលរួមជូនពរដល់នាង ប៉ុន្តែបើក្រឡេកទៅមើលស្វាមីបណ្តូលចិត្តវិញនោះ នៅ សូនីតា បានប្រាប់ថាខ្លួនមិនបានកាដូពីស្វាមីដូចឆ្នាំមុនៗនោះឡើយ ក៏ព្រោះតែរឿងម្យ៉ាង ។ យ៉ាងណាអ្នកនាងក៏មិនតូចចិត្តអ្វីនោះឡើយ តែសូមត្រឹមប្រាថ្នារឿងម្យ៉ាង ។

នៅ សូនីតា បានរៀបរាប់ថា «រីករាយថ្ងៃកំណើតខ្លួនឯង (happy birthday to me) 30 06 90 អរគុណលោកទាំង ២ ដែលផ្តល់ថ្ងៃខែឆ្នាំកំណើតបូកគ្នាបានលេខ ៩ សូមឱ្យវាសនាកូនខ្ពស់ដូចលេខ ។ សូមអរគុណលោកប្តី ឆ្នាំនេះមិនបាច់មានកាដូអីទេសូមមានវត្តមានបែបរហូត ១ ជីវិត ឆ្នាំមុនបានកាដូទូរស័ព្ទ ១ បើគ្មានកាដូបងទេ ប្រហែលប្រើអាចាស់ហើយក៏មិនមានអី live លក់អីវ៉ាន់មកដល់សព្វថ្ងៃនេះដែរ ។ មិនតូចចិត្តទេ ព្រោះដឹងថាបងហត់ណាស់ មិនមានចំណូលសម្រាប់ជាកាដូល្អៗដល់អូនដូចឆ្នាំមុនទេ តែកាដូដែលសំខាន់គឺពួកយើងត្រូវសន្យាថានឹងចាប់ដៃគ្នារកស៊ី ចាប់ផ្តើមពីចំណុចសូន្យឡើងទៅ ប្រឹង និង តស៊ូជាមួយគ្នា» ។

គួរបន្ថែមថា បច្ចុប្បន្នបើទោះជាមិនបានបង្ហាញវត្តមាក្នុងការងារសិល្បៈដូចមុនក្តី ប៉ុន្តែអ្នកនាង នៅ សូនីតា បានបង្កើតមុខរបស់ផ្ទាល់ខ្លួន ដោយលក់ផលិតផលថែសម្រស់ និង សម្លៀកបំពាក់តាមអនឡាញផងដែរ ៕