ខុសគ្នាដាច់ផឹង រូបភាព យក់ ឋិតរដ្ឋា និង ស្វាមី កាលពីជាង ១៥ ឆ្នាំ មុន
បើគិតមកដល់ឆ្នាំ ២០២១ នេះ រយៈពេលជិត ១៥ ឆ្នាំមកហើយ ដែលតារាចម្រៀង យក់ ឋិតរដ្ឋា និង អតីតមិត្តរួមក្រុម EV Band លោក ឃុំ ប៉ុណ្ណាដែត បានបញ្ចប់ភាពនៅលីវ និង រៀបការជាមួយគ្នាសាងគ្រួសារយ៉ាងមានសុភមង្គលតាំងពីកំឡុងខែឧសភា ឆ្នាំ ២០០៦ មក ។ មកដល់ពេលនេះ តារាចម្រៀងប្រុសស្រីមួយគូខាងលើនេះ ក៏ទទួលបានចំណងដៃកូនប្រុស ២ នាក់ និង កូនស្រី ១ នាក់ ហើយដែរ ។
យ៉ាងណាមិញ ថ្មីៗនេះ អ្នកនាង យក់ ឋិតរដ្ឋា បានបង្ហោះរូបភាពមួយសន្លឹកថតនឹងស្វាមីកាលពីប្រមាណជាង ១៥ ឆ្នាំ មុន ដោយអ្នកនាងអះអាងថា កាលនោះអ្នកទាំង ២ នៅ Single រៀងៗខ្លួននៅឡើយទេ ។ លើសពីនោះ រូបភាពមួយសន្លឹកនោះដែរ បានធ្វើឱ្យមហាជនអ្នកគាំទ្រជាច្រើនរូប បានយកមកប្រៀបធៀបគ្នា នឹងរូបភាពនាពេលបច្ចុប្បន្នទៀតផង ។
ក្នុងនោះ អ្នកលេងបណ្តាញសង្គមហ្វេសប៊ុកខ្លះលើកឡើងថា កាលនោះនៅ Single រៀងៗខ្លួន អ្នកនាង យក់ ឋិតរដ្ឋា និង លោក ឃុំ ប៉ុណ្ណាដែត ថតរូបបានត្រឹមឈរក្បែរៗគ្នាតែមិនហ៊ានកៀកកិតស្និទ្ធស្នាលនោះទេ គឺមើលទៅខុសប្លែកគ្នាដាច់ផឹងក្រោយពីរៀបការរួច និង មានកូនៗហើយ គ្រប់រូបភាពទាំងអស់គឺស្និទ្ធស្នាលកៀកកើយខ្លាំង រហូតប៉ុស្តិ៍ខ្លះឱបថើបគ្នាយ៉ាងផ្អែមល្ហែមទៀតផង ។
ម្យ៉ាងវិញទៀត ក៏មានអ្នកគាំទ្រខ្លះសរសើរដែរថា កាលនោះតារាចម្រៀងទាំង ២ រូបខាងលើនេះ ពិតជាស្រស់ស្អាតស្រស់សង្ហាណាស់ ហើយបើទោះពេលនេះម្នាក់ៗឡើងគីឡូរៀងៗខ្លួនបន្តិចមែន ប៉ុន្តែមើលទៅនៅតែស្អាតៗមួយបែបតាមបែបលោកប៉ា អ្នកម៉ាក់៕
