ស្រវាមកលក់អនឡាញមិនបានប៉ុន្មាន ទូច ស្រីល័ក្ខ ពោលទាំងញញឹមខ្ជឹបបែបនេះបាត់!

ជាការពិតណាស់ មិនថាមុខរបររកស៊ី ឬ ការងារណាឡើយ គឺសុទ្ធសឹងតែមានភាពលំបាក និង ងាយស្រួលទៅតាមប្រភេទនៃអាជីពនោះ ។ បើយើងក្រឡេកទៅមើលអាជីពផ្នែកសិល្បៈ និង អ្នករកស៊ីនោះ ក៏ហាក់ខុសគ្នាបន្តិច ពេលខ្លះអ្នករកស៊ីអាចនឹងហត់នឿយជាងអាជីពជាតារា ជាពិសេសគឺអាជីពអ្នកលក់អនឡាញតែម្តង ពោលគឺត្រូវឡាយលក់ផលិតផលផង ទាក់ទងអតិថិនជនផង រៀបចំអីវ៉ាន់ជូនភ្ញៀវទៀត ។

យ៉ាងណាមិញ បើទោះជាអាជីពលក់អនឡាញមានការនឿយបន្តិចមែន ប៉ុន្តែនៅក្នុងយុគសម័យនេះ អាជីពផ្នែកនេះក៏ហាក់ពេញនិយមខ្លាំង រហូតមានសិល្បករ-ការិនីជាច្រើន បានបន្ថែមអាជីពជាអ្នកលក់អនឡាញ ដោយខ្លះលក់សម្លៀកបំពាក់ ខ្លះលក់កាបូប ខ្លះលក់គ្រឿងសម្អាង អាហារ និង ប្រើប្រាស់ផ្សេងៗទៀតជាច្រើន ។

ជាក់ស្តែងថ្មីៗនេះ តារាចម្រៀង ទូច ស្រីល័ក្ខ ដែលធ្លាប់កាន់ក្បាលមេក្រូច្រៀងលើឆាកតន្ត្រី សម្តែងនៅមុខកាមេរ៉ា ក៏បានបើកជំនួយថ្មីជាអ្នកលក់សម្លៀកបំពាក់ប៊្រេនល្បី តាមអនឡាញផងដែរ ។ ក្នុងនោះ អ្នកនាង ទូច ស្រីល័ក្ខ ក៏បានសារភាពថាអាជីពនេះពិតជាហត់ ប៉ុន្តែអ្នកនាងពិតជាពេញចិត្តយ៉ាងខ្លាំង ។

គួរឱ្យដឹងថា អ្នកនាង ទូច ស្រីល័ក្ខ មិនត្រឹមតែលក់អនឡាញតែម្យ៉ាងនោះទេ គឺអ្នកនាងមានគម្រោងរួចហើយដែរ បន្ទាប់ពីហាងរបស់នាងសាងសង់រួច ពោលគឺអ្នកនាងនឹងនាំចូលសម្លៀកបំពាក់ ទឹកអប់ និង របស់ប្រើប្រាស់ប្រ៊េនល្បីៗមកលក់នៅប្រទេសកម្ពុជា ហើយអតិថិជនអាចមករកទិញនៅហាងផ្ទាល់ទៀតផង ៕