ឆ្នាំ ២០២៣ ថមមី ប្រាថ្នាចង់ទៅប្រទេសបារាំងម្ដងទៀត ដើម្បីយកកូនប្រុស

អ្នកគាំទ្រច្បាស់ជាដឹងហើយថាតារាសម្ដែងប្រុសលោក ថម មី ក្រោយពីចាប់ដៃគ្នាជាមួយ តារាស្រី សួស វីហ្សា អស់ប្រមាណជា ២ ឆ្នាំ មកនេះ គឺទទួលបានកូនស្រីបណ្ដូលចិត្តម្នាក់ដែលគួរឱ្យស្រឡាញ់ ជាចំណងដៃ ។ ជារឿយៗ គ្រួសារតារាមួយគូនេះ តែងតែធ្វើឱ្យមហាជនលួចច្រណែនពីព្រោះថា ពួកគេតែងតែបង្ហោះរូបភាព ស្និទ្ធស្នាល ផ្អែមល្ហែមមិនសូវជាលស់ថ្ងៃណាឡើយ។

យ៉ាងណាមិញ ថ្មីៗ នេះ ពិតជាធ្វើឱ្យប្រិយមិត្តចាប់ក្រសែមើលទៀតហើយ សម្រាប់គ្រួសារដ៏សែនកក់ក្ដៅ លោក ថម មី និង តារាចម្រៀងស្រី សួស វីហ្សា បន្ទាប់ពីតារាប្រុសលោក ថម មី ចេញមកបង្ហោះរូបភាព ព្រមទាំងដាក់ Caption ថា ចង់បានកូនប្រុសម្នាក់ទៀត នាឆ្នាំ ២០២៣ ។

នេះបើតាមរយៈរូបភាព និង Caption តារាប្រុសខាងលើបានសរសេររៀបរាប់ថា« ដឹងកាលណាបានកូវីដចប់អស់ទេ អាងគ្នានេះបានទៅយកកូនថែមនៀក និយាយមុខស្ងួត ចប់ភ្លាមហោះទៅភ្លេតតាហ្មងទៅយកកូនប្រុស Johnny ព្រោះ Jenny ប្រាប់ថាចង់បានប្អូនហើយ តែម៉ាក់ៗថាចាំអស់កូវីដ ចាំ ២០២៣ »។

គួរបញ្ញាក់ផងដែរថា ក្រោយពីរៀបការភ្លាមៗ លោក ថម មី បានកាន់ដៃភរិយាទៅក្រេបទឹកឃ្មុំនៅទៅក្រុងបារីសប្រទេសបារាំង ដោយកាលនោះលោកបាននិយាយថា លោកទៅដើម្បីយកកូន ហើយក្រោយមកលោក និង តារាស្រី សួស វីហ្សា ក៏ទទួលបានកូនដូចបំណងប្រាថ្នាមែន ។

មកទល់ពេលនេះ កូនស្រីរបស់លោក នាងតូច Jenny មានអាយុ ប្រហែលជា ៧ ខែហើយ ដូច្នេះលោក គិតថានឹងចង់បានកូនប្រុសម្នាក់ទៀត តែដោយសារកូវីដ-១៩ ទើបត្រូវពន្យាពេលទៅដល់ឆ្នាំ ២០២៣ សិន ក្រែងបញ្ហាការរាតត្បាតនៃជំងឺកូវីដ-១៩ ស្ងប់ស្ងាត់ទៅវិញ៕