អាជីវករនៅផ្សារអូឡាំពិកធូរចិត្តខ្សាក ក្រោយបងថ្លៃ ឱក សុគន្ធកញ្ញា បញ្ជាក់ច្បាស់ៗបែបនេះ

បើគិតមកដល់ពេលនេះ ១០ ថ្ងៃហើយដែលបងថ្លៃរបស់តារាចម្រៀង ឱក សុគន្ធកញ្ញា បានសម្រាកព្យាបាលជំងឺកូវីដ-១៩ នៅអតីតសណ្ឋាគារអ៊ិនធើកុងទីណង់តាល់ ។ អ្វីដែលកត់សម្គាល់ក្នុងនោះអ្នកស្រីក៏បានប្រាប់ហេតុផលមួយដើម្បីឱ្យបងប្អូនអាជីវករ នៅផ្សារអូឡាំពិកទាំងអស់បានស្ងប់ចិត្តផងដែរ ។

បងថ្លៃរបស់ ឱក សុគន្ធកញ្ញា ដែលត្រូវបានគេស្គាល់ថាជាម្ចាស់ហាងលក់កាបូបតាមអនឡាញមានប្រជាប្រិយភាពម្នាក់ ។ បច្ចុប្បន្ននេះអ្នកស្រីកំពុងសម្រាកព្យាបាលជំងឺកូវីដ-១៩ ហើយកាលពីថ្ងៃទី ១៩ ម្សិលមិញនេះ អ្នកស្រីក៏បានឡាយវីដេអូថាសុខភាពរបស់អ្នកស្រីពេលនេះបានប្រសើរច្រើនជាងមុន តែមិនទាន់ច្បាស់ថាពេលណាអ្នកស្រីនឹងបានចាកចេញពីមន្ទីរពេទ្យឡើយ ។ ក្នុងនោះអ្នកស្រីក៏បានផ្តាំទៅអាជីវករនៅផ្សារអូឡាំពិកទាំងអស់ឱ្យបានស្ងប់ចិត្ត ព្រោះអ្នកស្រីក៏ដូចជាក្រុមគ្រួសារមិនបានចូលក្នុងផ្សារនេះទេ រហូតដល់ថ្ងៃមកសម្រាកនៅមន្ទីរពេទ្យ ។

គួរបញ្ជាក់ថា បងថ្លៃរបស់ ឱក សុគន្ធកញ្ញា បានមកសម្រាកនៅក្នុងសណ្ឋាគារ The Great Duke តាំងពីថ្ងៃទី ១០ ខែមីនា ដោយអ្នកស្រីបានអះអាងថាបានប៉ះពាល់ជាមួយពិធីការិនី កែវ ចាន់និមល ។ សរុបសមាជិករបស់អ្នកស្រីមានជាង ១០ នាក់ដែលផ្ទុកជំងឺមួយនេះ ៕