ជុំ ស៊ីថា នៅតែរំភើបចិត្តមិនទាន់បាត់ ពេលក្លាយជាគ្រួសារទី ៣៧០ មានកូនភ្លោះ ៣ នៅកម្ពុជា

កាលពីថ្ងៃទី ២២ ខែធ្នូ ឆ្នាំ ២០២០ កន្លងទៅនេះ តារាសម្តែងលោក ជុំ ស៊ីថា ទទួលបានកាដូធំចុងឆ្នាំយ៉ាងមានសុភមង្គល ដោយភរិយារបស់លោកសម្រាលបានកូនភ្លោះ ៣ យ៉ាងជោគជ័យ និង ទទួលបានសុខភាពល្អទាំងម្តាយកូន ។ កូនភ្លោះ ៣ របស់លោក ជុំ ស៊ីថា គឺមានកូនប្រុស ២ នាក់ និង កូនស្រី ១ នាក់ ។

ក្រោយពីកូនប្រុសស្រីសម្រាលហើយ លោក ជុំ ស៊ីថា និង ភរិយា ទទួលបានការអបអរ និង ជូនពរយ៉ាងច្រើនពីសំណាក់មហាជនអ្នកគាំទ្រ និង មិត្តក្នុងសង្គមសិល្បៈ ក៏ព្រោះលោកគឺជាតារាប្រុសដំបូងដែលមានកូនភ្លោះ ៣ ។

លើសពីនោះអ្វីដែលកាន់តែគួរឲ្យរំភើបទៀត កាលពីថ្ងៃទី ០៥ ខែមករា ឆ្នាំ ២០២១ តារាសម្តែង ជុំ ស៊ីថា និង ភរិយា ក៏ទទួលបានអំណោយពីសម្តេចតេជោ ហ៊ុន សែន និង សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់កូនភ្លោះទាំង ៣ ទៀតផង ដោយក្នុងនោះគ្រួសាររបស់លោក គឺជាគ្រួសាកូនភ្លោះ ៣ ទី ៣៧០ ហើយដែលទទួលបានអំណោយពីសម្តេចតេជោ និង សម្តេចកិត្តិព្រឹទ្ធបណ្ឌិត ។

ទន្ទឹមនឹងគ្នានោះដែរ ទោះជាទទួលបានអំណោយរយៈពេលជាងមយយសប្តាហ៍ហើយក្តី តែលោក ជុំ ស៊ីថា នៅតែរំភើបចិត្ត ព្រមទាំងបានបង្ហោះសារថា «ខ្ញុំជាគ្រួសារទី ៣៧០ ដែលទទួលបានកូនភ្លោះ ៣ រយៈពេល ២២ ឆ្នាំ ចាប់តាំងពីឆ្នាំ ១៩៩៩ ដល់ឆ្នាំ ២០២១ នៅក្នុងប្រទេសកម្ពុជាទើបមានកូនភ្លោះ ៣ ឬ ៤ តែ ៣៧០ គ្រួសារតែប៉ុណ្ណោះ» ៕