សល់តែសំឡេង! បទ «យប់នេះខ្ញុំចង់ញ៉ាំស្រា» កំពុងផ្ទុះល្បីខ្លាំង តែគួរឱ្យស្ដាយម្ចាស់បទបានស្លាប់ជិត ៣ ឆ្នាំហើយ

បច្ចុប្បន្ននេះ នៅលើបណ្ដាញសង្គមនានា ជាពិសេសនៅក្នុងបណ្ដាញសង្គម Tik Tok កំពុងផ្ទុះការចាប់អារម្មណ៍ទៅលើបទចម្រៀងបែបរ៉ុក ក្រោមចំណងជើង «យប់នេះខ្ញុំចង់ញ៉ាំស្រា» ដោយមានមហាជនក្មេងចាស់ប្រុសស្រីជាច្រើន បាននាំគ្នាលើកយកបទចម្រៀងមួយនេះ ទៅច្រៀងត្រាប់តាមក្នុងវីដេអូ Tik Tok បង្ហោះធ្វើឱ្យមានការចាប់អារម្មណ៍ពីមិត្តភក្ដិនៅក្នុងបណ្ដាញសង្គម ។

មិនត្រឹមតែទទួលបានការចាប់អារម្មណ៍តែនៅលើបណ្ដាញសង្គមនានាទេ សូម្បីតែនៅក្នុងពិធីជប់លៀងបែបគ្រួសារនៅតាមផ្ទះ ឬនៅតាមភោជនីយដ្ឋានមួយចំនួន ក៏គេនិយមចាក់បទចម្រៀងមួយបទនេះឱ្យភ្ញៀវស្ដាប់កម្សាន្តផងដែរ ប៉ុន្ដែរឿងដែលសោកស្ដាយបំផុតនោះគឺ អ្នកនាង កាក់ ចន្ធី ដែលជាម្ចាស់បទកំពុងល្បីមួយនេះ បានស្លាប់លាចាកលោកនេះបាត់ទៅហើយ ដោយសារគ្រោះថ្នាក់ចរាចរណ៍ដ៏រន្ធត់មួយ កាលពីថ្ងៃទី ២០ ខែមីនា ឆ្នាំ ២០១៨ កន្លងទៅ ។

អ្នកនាង កាក់ ចន្ធី ត្រូវបានគេដឹងថា ស្លាប់នៅអាយុ ៣៨ ឆ្នាំ ហើយបើទោះបីជានៅក្នុងស្រុកខ្មែរយើង អ្នកនាងមិនសូវមានឈ្មោះបោះសំឡេងខ្លាំងក្នុងស្រទាប់យុវវ័យក៏ពិតមែន ប៉ុន្ដែអ្នកនាង ជាតារាចម្រៀងដ៏ពេញនិយមមួយរូបនៅក្រៅប្រទេស ដូចជានៅសហរដ្ឋអាមេរិក និង ប្រទេសបារាំងជាដើម ព្រោះថា អ្នកគាំទ្រនៅក្រៅប្រទេសចូលចិត្តរសជាតិថ្មីមិនថាអត្ថន័យ ស្ទីលនៃការច្រៀង ឬចង្វាក់ភ្លេងប្លែកខុសពីគេរបស់អ្នកនាងទេ សុទ្ធតែជាចំណុចទាក់ទាញចិត្តអ្នកគាំទ្រ ដែលទាំងអស់នេះហើយ ធ្វើឱ្យអ្នកនាង ត្រូវបានគេអញ្ជើញទៅសម្ដែងទៅក្រៅប្រទេសញឹកញាប់ ។

យ៉ាងណាមិញ ងាកមកមើលបច្ចុប្បន្នវិញ បទចម្រៀងពីរោះៗរបស់អ្នកនាង កាក់ ចន្ធី ជាពិសេសបទ «យប់នេះខ្ញុំចង់ញ៉ាំស្រា» កំពុងពេញនិយមខ្លាំងពីសំណាក់ទស្សនិកជន តែគួរឱ្យសោកស្ដាយបំផុត ដែលម្ចាស់បទមិនបាននៅរស់ ដឹងឮពីភាពល្បីល្បាញរបស់បទចម្រៀងរបស់ខ្លួន ៕