មិនធម្មតាទេ! ផលិតកម្ម Galaxy ប្រកាសរើសអ្នកនិពន្ធ ៣០ នាក់ ហ៊ានផ្ដល់ប្រាក់ខែដល់ ៥ ពាន់ដុល្លារ

ពីមួយថ្ងៃទៅមួយថ្ងៃ ទីផ្សារសិល្បៈចម្រៀងកាន់តែប្រកួតប្រជែងគ្នាខ្លាំងឡើងនៅលើទីផ្សារ ដែលក្នុងនោះគេក៏ឃើញផលិតកម្មជាច្រើនកំពុងប្រឹងប្រែងផលិតបទចម្រៀងថ្មីៗ ដើម្បីដណ្ដើមយកប្រជាប្រិយភាពពីសំណាក់មហាជន ។

ក្នុងនោះគេសង្កេតឃើញផលិតកម្ម Galaxy Navatra ដែលជាផលិតកម្មមួយទើបលេចពន្លកមិនប៉ុន្មានឆ្នាំសោះ ប៉ុន្ដែទទួលបានសន្ទុះនៃការគាំទ្រច្រើនផុសផុលពីសំណាក់ទស្សនិកជន ដោយបទផលិតកម្មខាងលើមានគ្រាប់ពេជ្រមួយគ្រាប់នៅក្នុងដៃគឺតារាចម្រៀង តន់ ច័ន្ទសីម៉ា ហើយកាលពីកំឡុងខែ សីហា ឆ្នាំ ២០២០ កន្លងទៅ ផលិតកម្មខាងលើ ក៏ធ្វើសន្និសីទកាសែតដ៏ធំមួយដើម្បីស្វាគមន៍កំពូលតារាចម្រៀង ព្រាប សុវត្ថិ ចូលក្នុងផលិតកម្មរបស់ខ្លួន ។

ខណៈកេរ្ដិ៍ឈ្មោះកាន់តែរីកសុះសាយឡើង ថ្មីៗនេះផលិតកម្ម Galaxy បានធ្វើឱ្យមហាជនភ្ញាក់ផ្អើលយ៉ាងខ្លាំង បន្ទាប់ពីផេកផ្លូវការរបស់ផលិតកម្មមួយនេះ ស្រាប់តែប្រកាសជ្រើសរើសអ្នកនិពន្ធដល់ទៅ ៣០ នាក់ ហើយលើសពីនេះ ខាងផលិតកម្មក៏ហ៊ានផ្ដល់ប្រាក់ខែពី ៥០០ ដុល្លារ ដល់ ៥ ០០០ ដុល្លារសហរដ្ឋអាមេរិកឯណោះ ។

បើមើលមួយផ្នែក នេះជាឱកាសដ៏ល្អវិសេសមួយសម្រាប់អ្នកដែលមានទេពកោសល្យខាងផ្នែកនិពន្ធ ដោយឡែកបើយើងក្រឡេកទៅមើលមួយផ្នែកទៀត មហាជនជាច្រើនយល់ថា នេះជាការបង្ហាញភាពជោគជ័យមួយរបស់ផលិតកម្ម Galaxy ៕