ខួបរៀបការ ១ ឆ្នាំ Mew Nittha ចង់ស្លៀករ៉ូបកូនក្រមុំដើរលើកម្រាលព្រំម្ដងទៀត

បើត្រឡប់ទៅរំឭកកាលពីថ្ងៃទី ១០ មករា ឆ្នាំ ២០២០ ឆ្នាំមុន តារាសម្ដែងស្រីថៃជួរមុខនាង Mew Nittha បានដឹកដៃស្វាមីដែលជាអ្នកជំនួញវាល់លាន ចូលរោងការដែលមានការរៀបចំយ៉ាងធំគគ្រឹកគគ្រេង ដោយមានអញ្ជើញសុទ្ធសឹងតែភ្ញៀវអ្នកមានមុខមានមាត់ក្នុងសង្គម និង អ្នកសិល្បៈល្បីៗលំដាប់ជួរមុខចូលរួម ។

ក្នុងកំឡុងរស់នៅក្នុងជីវិតអាពាហ៍ពិពាហ៍រយៈពេល ១ ឆ្នាំនេះ តារាស្រី Mew Nittha រស់នៅសុខស្រួលពោរពេញដោយសុភមង្គល មិនថាការទទួលបានការស្រឡាញ់ថ្នាក់ថ្នមពីស្វាមី ឬប្រើជីវិតកាលីបហាយសូរនោះទេ សូម្បីតែអាជីពការងារសិល្បៈ ក៏នាងបង្ហាញមុខយ៉ាងលេចធ្លោមិនឱ្យបាត់បង់ប្រជាប្រិយភាពដែរ ក្រោយរៀបការមានស្វាមីរួច ។

ជាមួយនឹងជីវិតសឹងតែឥតខ្ចោះរបស់តារាស្រី Mew Nittha ស្រាប់តែនៅថ្ងៃគម្រប់ខួបរៀបការមួយឆ្នាំរបស់នាង និង ស្វាមី តារាស្រីរូបនេះក៏បានទម្លាយរូបថតថ្ងៃមង្គលការបង្ហោះលើគណនី IG ព្រមទាំងលើកឡើងនូវពាក្យសម្ដីនឹកដល់ពេលវេលាដ៏មានអត្ថន័យនាពេលនោះយ៉ាងខ្លាំង រហូតធ្វើឱ្យនាងចង់ស្លៀករ៉ូបកូនក្រមុំដើរលើកម្រាលព្រំជាមួយស្វាមីសំណព្វចិត្តម្ដងទៀត ។

Mew Nittha លើកឡើងថា «ថ្ងៃនេះឆ្នាំមុន 10.01.2020 និង 10.01.2021 ពេលវេលាពិតជាដើរលឿនណាស់ នឹកដល់គ្រាដែលរីករាយរហូតចង់រៀបការម្ដងទៀត ប៉ុន្ដែខ្ញុំចង់ប្រាប់ថា សូមរៀបការជាមួយនឹងបុរសម្នាក់នេះដដែល» ៕