អតីតតារាសម្តែងជើងចាស់ សុខ ស្រីមុំ ដែលសម្បូរដោយសមត្ថភាព និង ទេពកោសល្យសម្តែងក្នុងកាយវិការក្រមិចក្រមើម ធ្វើមុខក្និកក្នក់គួរឱ្យក្នាញ់ បានលាឈប់ពីការសម្តែងអស់រយៈកាលជាង ២០ ឆ្នាំហើយ ចាប់តាំងពីអ្នកនាងបានបន្សាត់ខ្លួនទៅរស់នៅឯសហរដ្ឋអាមេរិកនោះមក ។ អ្វីដែលគួរឱ្យចាប់អារម្មណ៍ បើទោះជាអ្នកនាងឈប់សម្តែងក៏ពិតមែន ប៉ុន្តែរូបសម្រស់នៅតែស្រស់ស្អាត និង នៅតែខ្ញង់ដដែល ពោលគឺមិនចាស់តាមវ័យឡើយ ។
តារាសម្តែងស្រីថ្ពាល់ខួចល្បីនាទសវត្សរ៍ ៨០-៩០ សុខ ស្រីមុំ បានលាប្រិយមិត្តអ្នកគាំទ្រចេញទៅរស់នៅទឹកដីសហរដ្ឋអាមេរិក កាលពីខែកញ្ញា ឆ្នាំ ១៩៩៤ ដោយអ្នកនាងបានទម្លាក់ចោលទាំងស្រុងនូវការសម្តែងទាំងអស់ ។ ប្រិយមិត្តនៅតែចងចាំការសម្តែងរបស់អ្នកនាងមិនភ្លេចឡើយ ព្រោះអ្នកនាងជាតារាសម្តែងមួយរូបដ៏មានទេពកោសល្យខ្ពស់ ដែលចូលចិត្តលេងទឹកមុខក្នុងឈុតក្រមិចក្រមើម រឡិករឡក់ ក្និកក្នក់ គួរឱ្យក្នាញ់ និង គួរឱ្យស្ងើចសរសើរ ។
បើទោះជាអតីតតារាសម្តែងឆ្នើមរូបនេះបានរសាត់ឆ្ងាយពីវិស័យភាពយន្ត និង ខ្សែចក្ខុប្រិយមិត្តអ្នកគាំទ្រយូរយ៉ាងណាក្តី ប៉ុន្តែបើក្រឡែកមើលរូបសម្រស់វិញ គេកត់សម្គាល់ឃើញអ្នកនាងនៅតែស្រស់ស្អាត ផូរផង់ ថែមទាំងសិចស៊ីមិនចាញ់តារាស្រករក្រោយប៉ុន្មានឡើយ ហើយជាង ២០ ឆ្នាំមកនេះ មិននឹងស្មានថាតារាសម្តែងនាសតវត្សរ៍ ៨០-៩០ រូបនេះនៅតែអាចថែរាងរៅ និង ដងខ្លួន ព្រមទាំងរូបសម្រស់ឱ្យនៅតែខ្ញង់គួរឱ្យសរសើរបែបនេះបានសោះ ។
គួររំឭកដែរថា បន្ទាប់ពីឈប់សម្តែងអស់ច្រើនឆ្នាំមកនេះ អ្នកនាង សុខ ស្រីមុំ បានហោះហើរមកលេងស្រុកកំណើតបានម្តងដែរកាលពីឆ្នាំ ២០០៧ ហើយបច្ចុប្បន្ននេះអ្នកនាងកំពុងរស់នៅរដ្ឋកាលីហ្វ័ញ៉ា សហរដ្ឋអាមេរិក ជាមួយស្វាមីក្រោយដែលជាផលិតករភាពយន្ដនៅទីនោះ ។ ចំណែកឯស្វាមីរបស់អ្នកនាងមុនដែលមានឈ្មោះ ខៃ ចាន់តារា ហៅ អ៊ួក រៀបការជាមួយគ្នាកាលពីឆ្នាំ ១៩៩៣ បានលែងលះគ្នាទៅហើយ ដោយបន្សល់ទុកនូវកូនប្រុសម្នាក់ជាចំណងដៃ ៕
អត្ថបទដោយ៖ សាកល
