អ្នកគាំទ្រ នឹកស្រណោះខ្លាំង ពេលឃើញ Chef ឫទ្ធី ក្នុងវីដេអូចាក់ផ្សាយយប់មិញ!

កាលពីយប់ថ្ងៃទី ២៥ ខែតុលា ឆ្នាំ ២០២០ កន្លងទៅនេះ កម្មវិធី MasterCHef Khmer បានឈានចូលដល់សប្តាហ៍ថ្មី ដោយបេក្ខជនដឺែលនៅសល់នៅតែបន្តក្តីស្រមៃមួយរួមគ្នាប្រកួតប្រជែងគ្នាធ្វើម្ហូបយ៉ាងស្វិតស្វាញដើម្បីដណ្តើមយកជ័យលាភី ហើយកាលពីយប់មិញនេះដែរមានបេក្ខជន ២ រូបត្រូវបានជម្រុះចេញពីកម្មវិធី នោះគឺកញ្ញា រីនណា និង លោក រ៉ាដូ ។

ទោះបីជាកម្មវិធីដំណើរទៅយ៉ាងរលូនពិតមែន ប៉ុន្តែអ្វីដែលដែលជាការចាប់អារម្មណ៍នោះ គឺមានមហាជនអ្នកទស្សនាជាច្រើនដែលទស្សនាតាមការ Live ផ្ទាល់លើទំព័រហ្វេសប៊ុកនៃកម្មវិធីនោះ បែរជាបាននឹកភ្នកទៅដល់លោក ស៊ឺ សោភ័ណ្ឌឫទ្ធី ដែលជា Chef និង ជាគណៈកម្មការមួយរូប ដែលទើបតែបាត់បង់ជីវិតកាលពីថ្មីៗកន្លងទៅនេះ ទាំងដែលកម្មវិធី MasterChef Khmer មិនទាន់បញ្ចាំងចប់ជាស្ថាពរនោះ ។

ពិតណាស់កាលពីយប់មិញនេះ គេសង្កេតឃើញមានអ្នកចូលរួមតាមរយៈ Comment ជាច្រើនក្រោមការ Live នៃកម្មវិធី ដោយម្នាក់ៗបានសរសេរពាក្យ Rip ទៅកាន់ Chef ឫទ្ធី យ៉ាងច្រើន ហើយក្នុងនោះដែរមហាជនអ្នកគាំទ្រក៏ថែមទាំងបានបង្ហាញក្តីនឹករឭក និង ការអាឡោះអាល័យដល់គណៈកម្មការរូបនេះទៀតផង ដោយពួកគេបានឃើញត្រឹមតែរូបភាព សកម្មភាព និង ស្តាប់ឮសំឡេង Chef តែក្នុងកម្មវិធី ប៉ុន្តែរូបកាយ និង សំឡេងពិតបានឃ្លាតចាកឆ្ងាយពីកម្មវិធី និង ពីអ្នកគាំទ្រទៅជារៀងរហូតលែងត្រឡប់ ។

នេះជាការស្រណោះស្រណោកមួយដែលអ្នកគាំទ្ររបស់គណៈកម្មការរូបនេះបានបង្ហាញចេញ ក្រោយពេលឃើញកម្មវិធីខាងលើបានចាក់ផ្សាយ បន្ទាប់ពីមរណភាពរបស់ Chef ឫទ្ធី កន្លងទៅនោះ ។ គួរឱ្យដឹងដែរថា លោក ស៊ឺ សោភ័ណ្ឌឫទ្ធី ដែលគេស្គាល់ថា Chef ឫទ្ធី ជាគណៈកម្មការក្នុងកម្មវិធី MasterChef Khmer បានទទួលមរណភាពកាលពីយប់ថ្ងៃទី ២០ ខែតុលា ឆ្នាំ ២០២០ កន្លងទៅនេះ ដោយសារជំងឺលើសឈាម និង ឡើងជាតិស្ករខ្ពស់ ៕