កាលពីថ្ងៃទី ១៦ ខែមីនា ឆ្នាំ ២០២៥ កន្លងទៅ អ្នកលេងបណ្តាញសង្គមហ្វេសប៊ុក ជាពិសេស អ្នកគាំទ្រតារាចម្រៀងរ៉េប លោក EMI បានបង្ហាញការរន្ធត់ចិត្តយ៉ាងខ្លាំង ក្រោយពីលោកបានបង្ហោះរូបភាពនៅលើឡានពេទ្យបញ្ជូនទៅមន្ទីរពេទ្យ។
ក្នុងរូបភាពមួយសន្លឹក ដាក់អុកស៊ីហ្សែនលើឡានពេទ្យ លោក EMI បានរៀបរាប់ថា៖ «សុំជំពាក់ហ្វេនៗកំពង់ចាម ក្នុងការហ៊ោយប់នេះ សង្ឃឹមមានឱកាសលើកក្រោយមិនឱ្យខកចិត្តនោះទេ ខ្ញុំនឹក និង ស្រលាញ់បងប្អូនហ្វេនៗកំពង់ចាមគ្រប់ភូមិស្រុក»។
មូលហេតុធ្វើឱ្យ តារាចម្រៀងរ៉េប EMI ត្រូវបញ្ជូនតាមឡានពេទ្យទៅកាន់មន្ទីរពេទ្យកាល់ម៉ែត្រនោះ ក៏ព្រោះតែលោកមានគ្រោះថ្នាក់អំឡុងពេលហាត់បាល់ ដោយច្រមុះលោកប៉ះជាមួយក្បាលកីឡាករដទៃ បណ្តាលឱ្យបាក់ឆ្អឹងច្រមុះ។ នេះបើតាមការឱ្យដឹងពីបងស្រីរបស់លោក EMI។
យ៉ាងណាមិញ ក្រោយពីបានសម្រាកនៅមន្ទីរពេទ្យ និង ទទួលការមើលថែយ៉ាងយកចិត្តទុកដាក់ហើយនោះ នៅរសៀលថ្ងៃទី ១៧ ខែមីនា ឆ្នាំ ២០២៤ នេះ លោក EMI ក៏បានចេញមកជម្រាបពីស្ថានភាពសុខភាពថា៖ «សុខភាព និង មុខរបួស (ផ្នែកច្រមុះ) ខ្ញុំបានប្រសើរច្រើនត្រឹមរយៈពេលខ្លី ដោយសារតែការថែរក្សាយកចិត្តទុកដាក់ពីក្រុមគ្រួសារ មិត្តភក្តិ បងប្អូនសិល្បករ និង អ្នកគ្រប់គ្រង។ លើសពីនេះ គឺលោកគ្រូអ្នកគ្រូពេទ្យ នៅមន្ទីរពេទ្យកាល់ម៉ែត្រ មើលថែទាំ ព្យាបាលយ៉ាងកក់ក្តៅ! ក៏មិនភ្លេចអរគុណទៅដល់បងប្អូនទាំងអស់គ្នា សម្រាប់ពាក្យជូនពរ និង ការព្រួយបារម្ភ។ ជួបគ្នាឆាប់ៗ»៕
