នៅតែបន្តបាត់ឈឹងគ្មានដំណឹងសោះ! គឹម លក្ខិណា បន្តភាពស្ងប់ស្ងាត់ ឯអ្នកគាំទ្រក្នុងប្រទេសកាន់តែនឹកខ្លាំង

អ្នកនាង គឹម លក្ខិណា ដែលពីមុនជាតារាចម្រៀងប្រចាំផលិតកម្មរស្មីហង្សមាសដ៏មានប្រជាប្រិយភាព និង ល្បីល្បាញម្នាក់ បានបាត់មុខពីឧស្សាហកម្មចម្រៀងរាំជាច្រើនឆ្នាំណាស់មកហើយ បន្ទាប់ពីអ្នកនាងបានរៀបការ និង ចេញទៅរស់នៅតាមប្តីឯទឹកដីសហរដ្ឋអាមេរិកមក។

ក្រោយការចាកចេញពីវិស័យសិល្បៈរបស់តារាចម្រៀងល្បីឈ្មោះ គឹម លក្ខិណា ស្ងាត់ៗទៅរស់នៅតាមស្វាមីឯនាយសមុទ្រនោះ បានធ្វើឱ្យបណ្តាអ្នកគាំទ្រជាច្រើនរបស់តារាចម្រៀងស្រីរូបនេះ ពោលនឹករឭកយ៉ាងខ្លាំង រហូតពួកគេក៏ទទូចចង់ឃើញវត្តមានម្ចាស់បទ «Ok ណាចា៎!» គឹម លក្ខិណា លេចមុខក្នុងវិស័យចម្រៀងម្តងទៀត ដើម្បីមកបំបាត់ការនឹករឭករបស់អ្នកគាំទ្រដែលកំពុងទន្ទឹងរង់ចាំនេះ។

មានការបង្ហោះសារជាច្រើនកាលពីកន្លងទៅនេះ ដោយគេបានបង្ហាញពីក្តីនឹករឭកចំពោះតារាចម្រៀង គឹម លក្ខិណា ដែលជាតារាចម្រៀងមួយរូបដក់ក្នុងដួងចិត្តរបស់ពួកគេ រហូតមានអ្នកគាំទ្រមួយចំនួនបានបញ្ចេញអារម្មណ៍ថា ៖ «ទោះអាយដលទៅចោលយូរយ៉ាងណាក៏នៅតែចាំ នៅតែស្រឡាញ់ នៅតែនឹករឭក ហើយក៏រំពឹងថានៅថ្ងៃណាមួយនឹងអាចឃើញអាយដលក្នុងកម្មវិធីណាមួយ បើអាចទៅរួច» ទៀតផង។

គួរបញ្ជាក់ដែរថា តារាចម្រៀង គឹម លក្ខិណា បានបន្សាត់ខ្លួនចេញពីវិស័យសិល្បៈចម្រៀង បន្ទាប់ពីតារាចម្រៀងរូបនេះបានរៀបការ និង ចេញទៅរស់នៅតាមស្វាមីឯទឹកដីសហរដ្ឋអាមេរិកស្ងាត់ៗ ដោយគិតរហូតមកដល់ពេលនេះមានរយៈពេលប្រមាណជាជិត ២០ ឆ្នាំមកហើយ និង ទទួលបានចំណងដៃកូនប្រុស ២ រូប៕