នៅពេលដែលមហាជនបានឃើញការសម្តែងរបស់សិល្បការិនីស្រករក្រោយក្នុងតួអង្គកាចឆ្នាសឆ្នើម ក្រមិចក្រមើម កម្សត់ទឹកភ្នែក ម្តងៗ ពួកគេតែងតែនឹករឭកដល់តួឯកស្រីឆ្នើម ៣ ដួងនាទសវត្សរ៍ឆ្នាំ ៨០ និង ៩០ គឺអ្នកនាង អម្ពរ ទេវី អ្នកនាង ចាន់ តារាទី និង អ្នកនាង សុខ ស្រីមុំ ដោយអតីតតួឯកស្រីដ៏មានប្រជាប្រិយភាពទាំង ៣ ដួងនេះ បានឆក់យកដួងចិត្តប្រិយមិត្តអ្នកគាំទ្រយ៉ាងច្រើនលើសលប់កាលពីពេលកន្លង តាមរយៈទេពកោសល្យ និង ការសម្តែងដ៏ប៉ិនប្រសប់របស់ខ្លួន។ មានប្រិយមិត្តអ្នកគាំទ្រជាច្រើនបាននិយាយថា ពួកគេមិនដែលភ្លេចតួឯកស្រី ៣ ដួងនេះទេ ដោយពួកគេនៅតែចងចាំ និង ចូលចិត្តរាល់ការសម្តែងរបស់ពួកគាត់ទាំងអស់។
១. អ្នកនាង អម្ពរ ទេវី
អ្នកនាង អម្ពរ ទេវី បានកើតនៅឆ្នាំ ១៩៧០ មានបងប្អូន ៥ នាក់។ អ្នកនាងគឺជាតារាសម្តែងរបស់ខ្មែរក្នុងទសវត្សរ៍ឆ្នាំ ៨០ ជាងរហូតដល់ឆ្នាំ ៩០ មួយរូប ដែលធ្វើឱ្យមហាជនទាំងក្នុង និង ក្រៅប្រទេសចាប់អារម្មណ៍វិស័យភាពយន្តរបស់កម្ពុជា។ ក្នុងរយៈពេលនៃអាជីព អ្នកនាងបានសម្តែងក្នុងខ្សែភាពយន្តជាច្រើន ហើយខ្សែភាពយន្តដំបូងរបស់អ្នកនាងត្រូវបានចេញផ្សាយក្នុងឆ្នាំ ១៩៨៨ ដោយចាប់ដៃគូសម្តែងជាមួយលោក សម វិជ្ជា។
បន្ទាប់ពី សម វិជ្ជា ស្លាប់បាត់នៅក្នុងឆ្នាំនោះ អ្នកនាង អម្ពរ ទេវី បានបន្តដើរតួសម្តែងភាគច្រើនជាមួយ ទេព រិន្ទដារ៉ា និង មានតារាប្រុសជាច្រើនរូបទៀត ដូចជាលោក ខៃ ប្រសិទ្ធិ ជាដើម។ អ្នកនាង អម្ពរ ទេវី ត្រូវបានមហាជនកត់ទុកជារាជិនីសម្តែងឆ្នើមប្រចាំទសវត្សរ៍ឆ្នាំ ៨០ និង ៩០ ដោយសារមន្តស្នេហ៍នៃការសម្តែងរបស់អ្នកនាង មានភាពប៉ិនប្រសប់ និង ក្រមិចក្រមើម ទាក់ទាញគួរឱ្យចង់ទស្សនា។
២. អ្នកនាង ចាន់ តារាទី
អ្នកនាង ចាន់ តារាទី ជាតារាភាពយន្តមួយដួងដែលចាប់ផ្តើមរះឡើងនៅពាក់កណ្តាលទសវត្សរ៍ឆ្នាំ ៨០។ អ្នកនាងចូលរួមសម្តែងបានជាច្រើនរឿង ហើយមានកេរ្តិ៍ឈ្មោះល្បីខ្លាំងក្នុងពិភពសិល្បៈភាពយន្ត ។ ទោះបីជាមានវ័យចំណាស់បនិ្តចក្តី ប៉ុន្តែអ្នកនាង ចាន់ តារាទី នៅតែចាប់អាជីពសិល្បៈសម្តែងភាពយន្តដដែល និង ពេលនេះអ្នកនាងក៏មានមុខរបររកស៊ីបន្ថែមពីលើអាជីពសិល្បៈទៀតផងដែរ។
អ្នកនាង ចាន់ តារាទី កន្លងមកក្រៅពីសម្តែងខ្សែភាពយន្តបានប្រមាណជាង ១០០ រឿងនោះ ក៏ធ្លាប់ចូលរួមសម្តែងចម្រៀងកាយវិការខារ៉ាអូខេថែមទៀត។ ដៃគូសម្តែងដ៏ស័ក្តិសមរបស់តារាសម្តែងជើងចាស់រូបនេះ មានដូចជា លោក ទេព រិន្ទដារ៉ូ លោក យស បូវណ្ណៈ លោក ខៃ ប្រសិទ្ធ ជាដើម។ តារាសម្តែងស្រីរូបនេះ ក៏មិនខុសពីអ្នកនាង អម្ពរ ទេវី ដែរ ដោយអ្នកនាងត្រូវបានមហាជនកោតសរសើរកប់ៗមាត់ពីទេពកោសល្យ និង ល្បិចសម្តែងដ៏ប៉ិនប្រសប់ដែលគ្មាននរណាអាចធ្វើដូចបានឡើយ។
៣. អ្នកនាង សុខ ស្រីមុំ
អ្នកនាង សុខ ស្រីមុំ ក៏ជាតារាភាពយន្តដ៏មានកេរ្តិ៍ឈ្មោះបោះសំឡេងក្នុងប្រទេសកម្ពុជា កាលពីចុងទសវត្សរ៍ទី ៨០ ដល់ទសវត្សរ៍ទី ៩០ ដែលមានទេពកោសល្យសម្ដែងយ៉ាងស័ក្តិសមឥតខ្ចោះក្នុងឈុតក្រមិចក្រមើម រឡិករឡក់ ក្និកក្នក់ គួរឱ្យស្ញើចសរសើរដែរ។ អ្នកនាងកើតនៅឆ្នាំ ១៩៧៣ និង ជាកូនទី ៤ ក្នុងចំណោមបងប្អូន ៦ នាក់។ ដោយសារតែទេពកោសល្យសម្តែងមានភាពប៉ិនប្រសប់ខ្លាំងនោះ អ្នកនាងត្រូវបានមហាជនជាច្រើនកោតសរសើរ និង លើកជាកំពូលតារាសម្តែងមួយដួងនាទសវត្សរ៍ឆ្នាំ ៨០ និង ៩០ ហើយតារាប្រុសដែលសម្តែងសមនឹងអ្នកនាងជាងគេគឺលោក ខៃ ប្រសិទ្ធ៕
