នៅវេលាម៉ោង ៧ ព្រឹក ថ្ងៃទី ១១ ខែសីហា ឆ្នាំ ២០២៥ នេះ អ្នកនាំពាក្យរាជរដ្ឋាភិបាល បានធ្វើសេចក្តីសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅទីស្តីការគណៈរដ្ឋមន្ត្រី។
តាមរយៈសេចក្ដីសង្ខេបព័ត៌មាន អ្នកនាំពាក្យក្រសួងការពារជាតិ បានលើកឡើងពីស្ថានភាពបច្ចុប្បន្នឱ្យបានដឹងថា សភាពការណ៍ជួរមុខគិតចាប់តាំងពីម៉ោង ១២ រំលងអធ្រាត្រថ្ងៃទី ១១ ខែសីហា ឆ្នាំ ២០២៥ ដល់វេលាម៉ោង ៦:០០ នាទីព្រឹកនេះ សភាពការណ៍ជួរមុខតាមបន្ទាប់ព្រំដែនខេត្តព្រះវិហារ និង ខេត្តឧត្តរមានជ័យ មានសភាពស្ងប់ស្ងាត់ កងកម្លាំងរបស់យើងកំពុងឈរជើងប្រុងប្រយ័ត្ន ក្នុងការបំពេញតួនាទីរបស់ខ្លួនយ៉ាងខ្ជាប់ខ្ជួនបំផុត។
ក្នុងនោះ អ្នកនាំពាក្យក៏បានលើកឡើងឱ្យដឹងផងដែរថា នៅថ្ងៃទី ១០ ខែសីហា ឆ្នាំ ២០២៥ មេបញ្ជាការយោធាភូមិភាគទី ២ ប៊ុនស៊ីន ផាត់ឃ្លាំង បានប្រកាសផែនការមុនចូលនិវត្តន៍របស់ខ្លួនដែលនៅសល់តែ ៥១ ថ្ងៃទៀតដោយ៖
ទី១. ដណ្តើមកាន់កាប់ប្រាសាទតាក្របីពីការគ្រប់គ្រងស្របច្បាប់របស់កម្ពុជា
ទី២. ប្រកាសបិទប្រាសាទតាមាន់ធំដែលស្ថិតក្នុងដែនអធិបតេយ្យ និង បូរណភាពទឹកដីកម្ពុជា។
ការប្រកាសនេះជាភស្តុតាងមិនអាចប្រកែកបាន បញ្ជាក់ពីការបង្កហេតុ និង ជាការប៉ុនប៉ងឈ្លានពានទឹកដីកម្ពុជាដោយចេតនា និង គិតទុកជាមុន ហើយទង្វើរបស់មេបញ្ជាការភូមិភាគ ២ ថៃខាងលើ ក៏ជាការរំលោភបំពានលើកិច្ចព្រមព្រៀងបទឈប់បាញ់ សម្រេចនៅក្នុងកិច្ចប្រជុំពិសេសនាថ្ងៃទី ២៨ ខែកក្កដា ឆ្នាំ ២០២៥ និង ស្មារតីនៃកិច្ចប្រជុំវិសាមញ្ញរបស់គណៈកម្មាធិការព្រំដែនទូទៅ GBC កាលពីថ្ងៃទី ៧ ខែសីហា ឆ្នាំ ២០២៥ នៅប្រទេសម៉ាឡេស៊ី។ ក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ GBC ភាគីកម្ពុជា-ថៃបានឯកភាពគ្នា ជាពិសេសចំណុចទី ២ ដែលបានចែងថា ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការមិនដើរល្បាតហួសពីទីតាំងរបស់ខ្លួនដែលឈរជើងឡើយ៕
