ជារឿងដ៏គួរឱ្យសោកសង្រេង និង នឹកស្មានមិនដល់ នៅយប់ថ្ងៃទី ១៣ ខែសីហា ឆ្នាំ ២០២៥ មានករណីក្មេងប្រុសម្នាក់ បានលង់ទឹកស្លាប់នៅប្រឡាយក្បែរផ្ទះ ស្ថិតក្នុងសង្កាត់កំពង់សំណាញ់ ក្រុងតាខ្មៅ ខេត្តកណ្ដាល ខណៈឪពុកជនរងគ្រោះជា វីរកងទ័ពកម្ពុជាម្នាក់ ដែលកំពុងជាប់បំពេញបេសកកម្មនៅសមរភូមិមុខ។
តាមប្រភពព័ត៌មានបានឱ្យដឹងថា យុទ្ធជនឈ្មោះ គៀន រ៉ូត ដែលកំពុងឈរជើងនៅសមរភូមិមុខ ក្រោយទទួលបានដំណឹងដ៏សោកសៅ នៃការបាត់បង់កូនប្រុសជាទីស្រលាញ់បំផុត បានរៀបរាប់ថា ៖ «ប៉ាការពារទឹកដីបាន ហេតុអីប៉ាការពារកូនមិនបាន ប៉ាសុំទោស នេះជាកំហុសរបស់ប៉ា ដែលប៉ាមិនបានមើលថែកូន ប៉ាទទួលយកអត់បានទេ។ កូនសម្លាញ់ប៉ា ទ្រាំបន្តិចទៅ ប៉ាជិតទៅដល់ហើយ កូនប៉ាមិនអីទេ? កូនខ្លាំង កូនប៉ារឹងមាំណាស់ កូនប៉ាឆ្លាតណាស់ ចាំប៉ានាំកូនដើរលេង ញ៉ាំចំណីដែលកូនចូលចិត្ត ទិញស្បែកជើងថ្មីឱ្យកូន ចាំប៉ាណាកូន»។
សម្រាប់ស្ដ្រីជាម្ដាយវិញ ក្រោយហេតុការណ៍នេះមានការតក់ស្លុតយ៉ាងខ្លាំងរហូតសន្លប់បាត់បង់ស្មារតី បច្ចុប្បន្នសពក្មេងប្រុសរងគ្រោះ កំពុងធ្វើបុណ្យនៅផ្ទះស្ថិតក្នុងសង្កាត់កំពង់សំណាញ់ ក្រុងតាខ្មៅ ខេត្តកណ្ដាល។ចំពោះ សប្បុរសជនដែលចង់ចូលរួមចំណែកទុក្ខ អាចទាក់ទងលេខទូរស័ព្ទរបស់ក្រុមគ្រួសារ 069 862 665 និង QR Code របស់វីរកងទ័ព គៀន រ៉ូត ដើម្បីចូលរួមរំលែកទុក្ខតាមសទ្ធា៕
