និយាយពីអ្នកនាង ជេស៊ីកា ដែលអ្នកគាំទ្រតែងហៅថា គណៈកម្មការដ៏ស្រស់សោភា កន្លងមក ក្រៅពីទទួលបានការចាប់អារម្មណ៍សរសើរពីសមត្ថភាពដ៏ឆ្នើម និង ភាពម៉ឺងម៉ាត់ក្នុងនាមជាគណៈកម្មការនៃកម្មវិធី MasterChef Cambodia អ្នកនាងក៏ត្រូវបានមហាជនចាប់អារម្មណ៍ពីជីវិតឯកជន ការងារមុខជំនួញផ្សេងៗ រឿងរ៉ាវស្នេហា ព្រមទាំងសកម្មភាពខាងក្រៅផ្សេងៗដ៏គួរឱ្យស្រឡាញ់ជារឿយៗ។
ចំពោះរឿងរ៉ាវស្នេហាវិញ គណៈកម្មការរូបស្រស់ ជេស៊ីកា ត្រូវគេបានដឹងថា អ្នកនាងបានភ្ជាប់ពាក្យជាមួយគូដណ្ដឹងរូបសង្ហា និង ស្រឡាញ់មើលចិត្តគ្នារយៈពេលជាង ២ ឆ្នាំមកហើយ ដែលអ្នកនាងតែងបង្ហាញពីចំណងស្នេហ៍ជាសាធារណៈ ស្ដែងពីសកម្មភាពផ្អែមល្ហែមពេញដោយក្ដីសុខជាមួយគូដណ្ដឹងទាំងនៅក្នុងស្រុក និង ក្រៅប្រទេស។
ដោយឡែក មកដល់ថ្មីៗនេះ អ្វីកាន់តែចាប់អារម្មណ៍លើជីវិតស្នេហារបស់គណៈកម្មការរូបនេះ ដែលធ្វើឱ្យមហាជនអ្នកគាំទ្រកំពុងបង្ហាញការអបអររំភើប ខណៈបានឃើញហ្វេសប៊ុករបស់អ្នកនាង បង្ហោះរូបភាពមួយសន្លឹកប្រកាសពីដំណឹងល្អ ដែលអ្នកនាងកំពុងពពោះកូនដំបូង ជាចំណងដៃនៃស្នេហារវាងអ្នកនាង និង គូដណ្ដឹងហើយ។ ក្នុងនោះ អ្នកនាង ជេស៊ីកា បានរៀបរាប់ថា ៖ «Our precious Can’t wait to meet the little one who’s half of me and half of you»៕
